Փաստ ինֆո

Ռուս միլիարդատեր Ռոման Տրոցենկոն, որը բավականին մեծ բաժնեմասեր ունի նաև ՀՀ-ում շահագործվող մի շարք հանքերում, հայտնվել է քաղաքական սկանդալի կենտրոնում։ «Настоящее время»-ում հրապարակվել է ռուս երկու միլարդատեր Ռոման Տրոցենկոյի զրույցի ձայնագրությունը մեկ այլ ռուս գործարարի՝ Նիկոլայ Մատուշևսկու հետ։ Ռուսական աղբյուրները նշում են, որ նրանք «Ռոսնեֆտ» պետական նավթային ընկերության նախագահ Իգոր Սեչինի կողմնակիցներն են, իսկ զրույցի ժամանակ քննարկել են ՌԴ-ում ստեղծված քաղաքական իրավիճակը։

Ձայնագրության մեջ լսվում է երկու տղամարդու ձայն, որոնք միմյանց Կոլյա և Ռոմա են անվանում։ Սկզբում նրանք քննարկում են Բալիում իրենց հանգիստը։ Կոլյան Ռոմային պատմում է, որ կղզում կան բազմաթիվ ներդրողներ ու հնարավարություններ։

«Ինձ համար վերջին շրջանում շատ դժվար է եղել Ռուսաստանում, որ ինչ-որ բան այն չէ», – բողոքում է Կոլյան, ինչի հետ մյուս զրուցակիցը, որը ենթադրաբար Տրոցենկոն է, համաձայնում է։ Այնուհետեւ Մատուշեւսկին պատմում է իր նոր ծրագրի՝ «Airbnb բիզնեսի համար», մասին։

Զրույցի մյուս հատվածում նրանք խոսում են արդեն Ռուսաստանի ներքաղաքական կյանքի մասին՝ քննարկելով պատերազմն ու Ռուսաստանում ստեղծված իրավիճակը։

«Ցավոք, Ռուսաստանը, որը մենք անկեղծորեն սիրում ենք, հայտնվել է ինչ-որ ապուշի ձեռքում։ Սա ոչ մի լավ բանով չի ավարտվի։ Ավարտվելու է դժոխքով։ Մարդիկ Մոսկվայի փողոցներում սպանելու են իրար»,-ասում է Ռոման՝ մինչդեռ Կոլյան փորձում է խոսակցություն սկսել առողջ սննդի ու բուսակերության մասին։

Կոլյան ասում է, որ վերջերս դիտել է բոլոր նախագահների ամանորյա շնորհավորանքները՝ Ելցինից մինչև վերջինը, երբ այդ «հիմարը ոչ թե տոնածառի ֆոնին է, այլ ինչպես միշտ, զինծառայողների»։

«Ինչպե՞ս կարող է ապրել և զարգանալ երկիրը, որտեղ միակ գաղափարախոսությունը փող աշխատելն ու իշխանությունը պահելն է մարդկանց մի խմբի կողմից»,-Ռոման հարցնում է իր զրուցակցին։

Աղբյուր` Փաստինֆո