Փաստ ինֆո

Ադրբեջանական կողմը չի շեղվել իր հայտարարություններից և իր գործողությունները կազմակերպում է հենց այդ հայտարարությունների շրջանակներում, և Արցախում տեղի ունեցողը մեզ համար պետք է ազդակ լինի, որ Ադրբեջանը հետևելու է իր բոլոր հրապարակային հայտարարություններին, որոնք միայն Արցախի մասին չեն, դրանք Երևանի նկատմամբ ունեցած հավակնությունների մասին են, երևակայական և հսկայական թվով, այսպես կոչված, ադրբեջանցի փախստականների՝ Հայաստանում բնակության մասին են, Հայաստանի գյուղերի մասին են: «ՓաստԻնֆոյի» եթերում ասել է ՀՀ ԱԺ «Հայաստան» խմբակցության պատգամավոր Քրիստինե Վարդանյանը:

Բանախոսի կարծիքով, պատերազմը երբեք միայն արցախյան չի եղել, դա հայկական է, հայկական հարցի լուծման համար է, ոչ ոք չի պատրաստվում Արցախով սահմանափակվել, պարզապես իրենք բաժանել են մակարդակների, տարբեր հարցերի և հերթով են գալիս ամեն հարցի հետևից. Արցախից հետո Սյունիքն է, Գեղարքունիքն է և Երևանն է: Խնդիրը հայկական պետության գոյությունն է այս տարածաշրջանում: Մեր ունեցած ռեսուրսները բավական են, որպեսզի կարողանանք պետականությունը պահպանել:

Անդրադառնալով նախկինում տեղի ունեցած բողոքի ակցիաներին, Ք. Վարդանյանը նշեց. «Եթե շատ ընդհանուր պատասխանեմ հարցին՝ մենք չկարողացանք ապահովել անհրաժեշտ մոբիլիզացիան: Դիմադրության շարժման ընթացքում մենք ունեցանք հսկայական քանակի մարդկանց մոբիլիզացիա, բայց մենք չկարողացանք ապահովել բավարարը՝ իշխանափոխության համար: 2018թ. նշան էր, որ կան բազմաթիվ խնդիրներ, որոնք պետք է լուծել, և այս 5 տարին նաև դա վերաիմաստավորելու առումով էր ճանապարհ, որը անցնում ենք»:

Պատգամավորի դիտարկմամբ, դիմադրության շարժման արդյունքների ամենալավ գնահատականը Թուրքիայից և Ադրբեջանից եկող արձագանքներն են, որոնք եղել են այն տեսքով, որ Հայաստանում կան ուժեր, որոնք չեն թողնում Ն. Փաշինյանին գնալ վճռական լուծումների: Հետևաբար, փողոցում մարդկանց ներկայությունը պաշտպանում է Հայաստանը և Արցախը: Մարդկանց ներկայությունը փողոցներում ուղերձ է միջազգային հանրությանը, Ն. Փաշինյանին, Ի. Ալիևին: Եթե այս պահին չկա, դա չի նշանակում, որ վաղը չի լինի, մի շաբաթ հետո չի լինի:

Մանրամասները՝ տեսանյութում:

Աղբյուր` Փաստինֆո