Փաստ ինֆո

Մանե Թանդիլյանը հայտարարությունն արել է՝ հղում կատարելով օրենքին, այն է՝ եթե գործող քաղաքապետի հրաժարականից երկու շաբաթ անց, առաջին նիստից հետո, նոր քաղաքապետ չի ընտրվում, ուրեմն, պետք է քաղաքապետի արտահերթ ընտրություններ կատարել,- «Փաստինֆո» լրատվականի հետ զրույցում ասում է քաղտեխնոլոգ Կարեն Քոչարյանը՝ նշելով, որ այս առումով, ես ոչ միայն որպես քաղտեխնոլոգ, այլև առաջին հերթին որպես քաղաքացի, կողմ է օրենքի գերակայությանը։

Հիշեցնենք՝ Մանե Թանդիլյանն այսօր հայտարարել է, որ «Ապրելու երկիր» կուսակցությունը պահանջում է Երևանի ավագանու արտահերթ ընտրություններ, որովհետև ստեղծված իրավիճակում օրենսդրությունն է այդպես նախատեսում։

Հարցին՝ արդյո՞ք նորաստեղծ «Ապրելու երկիր» կուսակցությունն ունի՞ բավարար չափով հեղինակություն, որպեսզի ավագանու արտահերթ ընտրություններ պահանջի, քաղտեխնոլոգ Կարեն Քոչարյանը նկատում է՝ ցանկացած քաղաքական կուսակցություն կամ դրա ղեկավար կարող է և իրավունք ունի այդօրինակ հայտարարութուններ կատարելու, հեղինակության հետ դա որևէ կապ ունենալ չի կարող. «Հիմա Հայաստանում գործող ցանկացած քաղաքական ուժ կարող է «կրակել» այն, ինչ ուզում է։ Այսօր Հայաստանում այնպիսի քաղաքական իրավիճակ է ստեղծվել, որ որևէ անհատ, քաղաքական ուժ կամ լիդեր չունի այդքան հեղինակություն, որպեսզի մենք քննարկենք նրանց հայտարություններ անելու կամ չանելու իրավունքի հարցը։ Իսկ եթե, այնուամենայնիվ, այդպիսիք կան, ապա «Ապրելու երկիր» կուսակցությունը ևս ունի՝ եթե ոչ նույնքան իրավունք, ապա նույնիսկ՝ ավելի»,- ասում է քաղտեխնելոգը։

Հարցին՝ որքա՞ն շանսեր ունի «Ապրելու երկիր» կուսակցությունը՝ ավագանու հնարավոր արտահերթ ընտրություններում որոշակի հաղթանակ ապահովելու համար, քաղտխնոլոգը պատասխանում է, թեև իր կողմից որևէ տեսակի սոցիոլոգիական հարցում չի իրականացվել, սակայն, ինքը կարծում է՝ բավարար չափով շանսեր «Ապրելու Երկիր» կուսակցությունն, այնուամենայնիվ, ունի գոնե միայն այն իրողությունից ելնելով, որ դեռևս չի հասցրել կեղտովել քաղաքական տարատեսակ անհասկանալի խաղերի մեջ։ Չի պատահել այնպիսի իրավիճակ, որ այս կուսակցությունն, օրինակ, ինչ – որ բան խոստանա ու չկատարի, նկատում է Կարեն Քոչարյանը և հավելում՝ չմոռանանք նաև, որ այս կուսակցության անունը կապվում և ասոցացվում է Ռուբեն Վարդանյան անձի հետ, ում ռեսուրսները բավականին մեծ են։

Հարցին՝ արդյո՞ք «Ապրելու երկիր» նորաստեղծ կուսակցության՝ ավագանու արտահերթ ընտրությունների գնալու այս հայտարարությունը կարո՞ղ է ինչ – որ կերպ փոխհամաձայնեցված լինի օրվա իշխանությունների հետ, քաղտեխնոլոգը քիչ հավանական է համարում. «Իհարկե, արտահերթ ընտրությունների գնալու համար միշտ էլ իշխանութուններն ավելի պատրաստ են լինում և, որպես կանոն, արտահերթի գնում են հենց իշխանությունները։ Ի տարբերություն ընդդիմությունների՝ նրանք ունեն բավարար չափով ռեսուրսներ, իրենց ցանկացած արդյունքը գրանցելու համար։ Ինչ վերաբերում է այս իշխանություններին, ապա նրանք որևէ մեկի հետ համագործակցելու կարիք չունեն, որովհետև այնքան խելացի, հմուտ և փորձառու են, որ ինչ ուզում, այն էլ անում են՝ առանց որևէ մեկի հետ համագործակցության կամ կարծիք ու խորհուրդ հարցնելու։

Եվ, եթե հաշվի առնենք վերջին բացահայտումը, որ նրանք, նույնիսկ, ամենաաստվածայինն են, հետևաբար, եթե օրվա իշխանությունները ցանկանային գնալ Երևանի քաղաքապետի արտահերթ ընտրությունների, ապա անկասկած, կգնային՝ առանց որևէ այլ քաղաքական ուժի հետ համագործակցության, այդ թվում նաև՝ ձեր կողմից նշված կուսակցության։ Իշխանությունը, պարզապես, վստահ չէ իր ուժերի վրա։ Սա է քաղաքապետի արտահերթ ընտրությունների չգնալու և հապաղելու նրանց պատճառը»,- ասում է քաղտեխնոլոգ Կարեն Քոչարյանը։

Աղբյուր` Փաստինֆո