Փաստ ինֆո

Վերջին օրերին ադրբեջանցիների գործողությունները, որով վերջնականապես փակվեց Արցախ տանող ճանապարհը, ապացույց է առ այն,որ նոյեմբերի 9-ի արձանագրությունն այլևս գոյություն չունի։ «Փաստինֆո»-ի եթերում նման արձանագրմամբ է հանդես եկել միջազգայնագետ Գրիգոր Բալասանյանը։ Ըստ նրա, նոյեմբերի 9-ի արձանագրությունը փոքր հնարավորություն էր մեզ համար՝հսկողության տակ պահել Սյունիքի ճանապարհները և որ ամենակաևորն է՝ պահել Բերձորը։

Հիշեցնենք ,որ նոյեմբերի 9-ի արձանագրության մեջ որևէ խոսք չկա Բերձորը հանձնելու մասին, մինչդեռ այն հանձնվեց, ինչը, ըստ փորձագետի, ևս մեկ ապացույց է, որ այդ փաստաթուղթն այլևս չի գործում։Բալասանյանը իր խոսքում շեշտեց, որ չնայած միջազգային դժգոհություններին Ադրբեջանը լուռ կատարում է իր գործը՝ ուշադրություն չդարձնելով Լաչինի միջանցքով երկկողմանի երթեւեկությունն անհապաղ վերականգնելու մասին Հաագայի դատարանի որոշմանը։ Փաստորեն՝ Ադրբեջանը ոչ միայն չի բացում Լաչինի միջանցքը ,այլև անցակետ է տեղադրում Հայաստան-Արցախ ճանապարհին։

Միջազգայնագետն ուշադրություն է հրավիրել այն փաստին, որ Հակարիի կամուրջը փակելու հետ կապված ՀՀ Արտաքին գործերի նախարարության հայտարարությունը ուղղված էր միայն ուղղված ռուսական կողմին, որով «հիշեցվում» էր նրանց պարտավորությունների մասին, սակայն զարմանալին այն էր, որ այդ նույն հայտարարության մեջ չկար ոչինչ ուղղված ՄԱԿ-ին և Հաագայի դատարանին։ Միջազգայնագետի կարծիքով ճիշտ կլիներ,որ հայտարարության մեջ այս կոչը ուղղվեր բոլոր պատասխանատուներին, որոնք նաեւ խուսափում են պատժամիջոցներ կիրառել Ադրբեջանի նկատմամբ։

Նկատենք, որ ԱՄՆ պետքարտուղարությունը եւս, կոչ անելով ադրբեջանցիներին չտեղադրել հսկիչ անցագրային կետ՝ Հայաստան-Արցախ ճանապարհին, միևնույն ժամանակ խուսափել է Ադրբեջանին մեղադրել Հաագայի դատարանի որոշումները չկատարելու մեջ։ Ավելին՝ հրաժարվել է հայտարարել, թե ինչպիսի պատժամիջոցներ կկիրառվեն Ադրբեջանի նկատմամբ, եթե վերջինս չկատարի Հաագայի դատարանի որոշումները, որոնք պարտադիր են ՄԱԿ անդամ բոլոր պետությունների համար։

«Այս ընթացքը ցույց է տալիս,որ ըստ էության,արցախցիները այս պահին մնացել են մենակ և միայն նրանք պետք է ոչ ստանդարտ որոշումներով,ոչ ստանդարտ հայտարարություններով և այլընտրանքային բանակցություններով ,փորձեն որոշել սեփական ճակատագիրը»,- ասել է Բալասանյանը։

Մանրամասները՝ տեսանյութում։

Աղբյուր` Փաստինֆո