Փաստ ինֆո

ԲԴԽ նախկին նախագահ Ռուբեն Վարդազարյանի պաշտպանը պահանջում է՝ դադարեցնել Վարդազարյանի նկատմամբ քրեական հետապնդումը և կարճել գործի վարույթը՝ պնդելով, որ նրա նկատմամբ քրեական հետապնդումն իրականացվում է քաղաքական դրդապատճառներով, հետևաբար, գործի քննությունն իրավաչափ համարվել չի կարող։

Միջնորդությամբ պաշտպան Արամ Օրբելյանը նախ ներկայացրել է գործադիր և օրենսդիր իշխանությունների կողմից դատական իշխանության նկատմամբ հետապնդումները, ապա՝ իրականացված հետապնդումներն անձամբ Ռուբեն Վարդազարյանի նկատմամբ։Նա մասնավորարես, հիշատակեց Գագիկ Ջհանգիրյանի և Ռուբեն Վարդազարյանի խոսակցության վերաբերյալ աղմկահարույց ձայնագրությունը, համաձայն որի՝ Գագիկ Ջհանգիրյանն առաջարկում էր Վարդազարյանին՝ թողնել ԲԴԽ նախագահի պաշտոնը՝ հայտարարելով, որ հրաժարականի դեպքում նրա դեմ քրեական գործերը չեն հարուցի, ընդ որում, պաշտպանը նկատում է, որ այդ փուլում Վարդազարյանի դեմ քրեական գործերի մասին տեղեկություն դեռևս չի եղել, դրանք հարուցված չեն եղել և ի պաշտոնե Գագիկ Ջհանգիրյանը չէր կարող իմանալ դրանց մասին։ Աղմկահարույց ձայնագրության վերլուծությանը հաջորդիվ պաշտպանության կողմը հիշեցրեց ԱԺ-ում Վճռաբեկ դատարանի դատավորի թեկնածուների քննարկման ժամանակ Ռուբեն Վարդազարյանին «ՔՊ»-ական պատգամավորների տված հարցերը, որոնք ուղիղ մեղադրանքներ են պարունակել՝ Վարդազարյանի կողմից իբրև քաղաքական հայտարարություններ անելու, իսկ Արման Բաբաջանյանն անգամ փաստացի մեղադրանքներ է հնչեցրել նրա հասցեին։

Ըստ պաշտպանության կողմի՝ փաստացի Ռուբեն Վարդազարյանի նկատմամբ հետապնդումներն իրականացվում են 2020թ նոյեմբերի 15-ի հայտարարության համար, որով Վարդազարյանը կոչ էր արել դատավորներին առաջնորդվել օրենքներով և ՀՀ Սահմանադրությամբ, իսկ ԱԺ-ում իշխանական խմբակցության ներկայացուցիչների հայտարարությունների տեքստը հետագայում տեղ են գտել Վարդազարյանին ներկայացված մեղադրանքում։ Փաստաբանը նաև հիշեցրեց, որ Վարդազարյանի նկատմամբ հետապնդումը հարուցվել է՝ առանց նրա անձեռնմխելիության հաղթահարման և այդ հիմքով էլ Երևանի ընդհանուր իրավասության դատարանը բավարարել էր հետապնդում իրականացնելու որոշման դեմ բողոքը՝ արձանագրելով իրավունքների խախտումը։ Դատական ակտը, սակայն, բողոքարկվել է դատախազության կողմից և բողոքը մակագրվել էր Վերաքննիչ քրեական դատարանի դատավոր Մհեր Արղամանյանին՝ դատական գործերի էլեկտրոնային բաշխման համակարգում ենթադրյալ միջամտության վերաբերյալ գործով համակարգի առգրավվման հենց հաջորդ օրը, որտեղ պաշտպանության կողմը ևս միտում տեսնում է։

Նախագահող դատավորը նշեց, որ կարճման միջնորդությունը, որը ներկայացվել է, ամբողջությամբ քաղաքական մոտեցումներով են, գործի հարուցման առիթը, սակայն, հանցագործության մասին հաղորդումն է, ինչին արձագանքելով՝ Օրբելյանը նշեց. «Ինչպե՞ս եք պատկերացնում՝ գործի հարուցման առիթը պետք է լիներ այն, որ Գագիկ Ջհանգիրյանը հաղորդում տար՝ նշելով, որ ամսի 15-ին ինքը հայտարարություն է տարածել՝ դրանով միջամտելով դատական գործընթացին ու քրգործ հարուցվե՞ր։ Իհարկե, քրեական գործի հարուցման առիթը պետք է լիներ, որ մարդը զանգեր, ասեր՝ իրեն զանգել հորդորել են։ Դրանից առաջ քաղաքական իշխանություններին էր ասել, քննարկում էր տեղի ունեցել, ու այդ մարդը դարձել է ԱԱԾ փոխտնօրեն, շրջանառվող լուրերով՝ դատական համակարգն է համակարգում։ Ֆորմալ առումով քրեական գործի հարուցման առիթը հաղորդումն է։ Սա է քաղաքական հետապնդման կոնտեքստը»։ Նշենք, որ նախորդ նիստերի ընթացքում պաշտպանը տարբեր հիմքերով միջնորդություններ ներկայացրել էր՝ պահանջելով կարճել վարույթը և դադարեցնել քրեական հետապնդումը և այդ միջնորդությունները դատարանի կողմից մերժելը պաշտպանն ապօրինի և ակնհայտ սխալ է գնահատում։

«Ցույց տվեք, որ Դուք չեք մնացել դատախազի կաղապարի մեջ, դարձել եք՝ դատավոր»,- դիմելով դատավորին նշեց Օրբելյանը՝ հայտարարելով, որ դատարանը պետք է բավարարի միջնորդությունը։

Դատավոր Վահե Դոլմազյանը որոշեց դատական նիստը հետաձգել՝ մինչև մայիսի 5-ը, ժամը՝ 10.00-ին։ Հաջորդ դատական նիստին առարկություններ կներկայացնի մեղադրող կողմը։

Հիշեցնենք, որ ՀՀ ԲԴԽ նախկին նախագահ Ռուբեն Վարդազարյանին ՀՔԾ-ում մեղադրանք է առաջադրվել՝ ՀՀ քրեական օրենսգրքի 332-րդ հոդվածի 3-րդ մասով՝ պաշտոնեական դիրքն օգտագործելով արդարադատության իրականացմանը խոչընդոտելու համար ու որպես խափանման միջոց կիրառվել ստորագրությունը՝ չհեռանալու մասին։ Վարդազարյանի դեմ քրեական գործ է հարուցվել՝ առանց նրա անձեռնմխելիության հաղթահարման՝ նախկին դատավոր, ԱԱԾ տնօրենի տեղակալ Անդրանիկ Սիմոնյանի հաղորդման հիման վրա։

Նշենք, որ քրեական գործը դատարան է ուղարկվել շուրջ մեկ տարի առաջ՝ 2021թ սեպտեմբեր ամսին, սակայն մեկ տարվա ընթացքում գործն այդպես էլ ապացույցների հետազոտման փուլին չէր հասել, գտնվում էր դատաքննության նավապատրաստման փուլում։ Այնուհետեւ Երևանի ընդհանուր իրավասության դատարանի դատավոր Մանվել Շահվերդյանը որոշում կայացրեց գործն ըստ ընդդատության Հակակոռուպցիոն դատարան ուղարկելու մասին և այժմ գործը դատավոր Վահե Դոլմազյանի վարույթում է։

Հեղինակ՝ Իզաբել Սահակյան

Լուսանկարում՝ նախկին դատախազ, ներկայումս դատավոր՝ Վահե Դոլմազյանը

Աղբյուր` Փաստինֆո