Փաստ ինֆո

ՊԲ նախկին հրամանատար Միքայել Արզումանյանը կշարունակի մնալ կալանավորված։ Հակակոռուպցիոն դատարանը՝ դատավոր Վարդգես Սարգսյանի նախագահությամբ, քիչ առաջ որոշում կայացրեց՝ Միքայել Արզումանյանի նկատմամբ ընտրված խափանման միջոց կալանավորումը ևս երեք ամսով երկարացնելու մասին՝ բավարարելով դատախազության միջնորդությունը։

«Փաստինֆո»-ի թղթակցի հաղորդմամբ՝ Հակակոռուպցիոն դատարանում այսօր դռնփակ ռեժիմով կայացել է Միքայել Արզումանյանի վերաբերյալ քրեական գործով առաջին դատական նիստը, որի շրջանակներում քննարկվել է նաև Արզումանյանի խափանման միջոցի հարցը։

Նիստի մեկնարկից առաջ լրագրողների հետ զրույցում պաշտպան Երեմ Սարգսյանը հայտնեց, որ Միքայել Արզումանյանն առաջադրված մեղադրանքը չի ընդունում։ Ըստ պաշտպանի՝ Միքայել Արզումանյանն իրեն առաջադրված մեղադրանքով պարզապես մեղավոր է «հռչակվել»՝ այլ անձանց դեմքը պարզեցնելու համար։ Պաշտպանը հերքեց ՔԿ վարկածը՝ «Արեգա» բարձունքի նահանջի վերաբերյալ՝ նշելով, որ Արզումանյանը նման հրաման չի տվել, ավելին, Սարգսյանը պնդեց, որ Արեգա սարը հետ չի գրավվել։ Նրա խոսքով՝ այդ պնդումներն իրենց ապացույցներով քրեական գործում կան։ «Այնտեղ որոշակի հաջողություններ եղել են յուրային ստորաբաժանումների կողմից, բայց հետ չի գրավվել»։

Բացի այդ, ըստ պաշտպանի, Միքայել Արզումանյանի դեմ ցուցմունք տված անձինք որոշակի շահեր են ունեցել, ցուցմունքները համաձայնեցրել են միմյանց հետ, սակայն այս պահին պաշտպանը զերծ մնաց ցուցմունքների մասին մանրամասներ հայտնելուց՝ նշելով, որ այս հանգամանքների մասին իրենք կխոսեն հետագայում։

Պաշտպանը նաև ուշադրություն հրավիրեց այն հանգամանքին, որ Արզումանյանը ՊԲ հրամանատար է նշանակվել այն ժամանակ, երբ պատերազմից մեկ ամիս էր անցել ու բանակն արդեն ծայրահեղ բարդ վիճակում էր գտնվում։ Գործում առկա են իրավասու պաշտոնատար անձանց ցուցմունքներ, որոնց համաձայն՝ Միքայել Արզումանյանի նշանակվելուն հաջորդած մի քանի օրերի ընթացքում իրավիճակը կտրուկ փոխվել է հօգուտ յուրային ուժերի, յուրային զոհերի քանակը մի քանի անգամ կրճատվել է։
Հիշեցնենք, որ 2022թ. օգոստոսի 30-ին Միքայել Արզումանյանը ձերբակալվեց Շուշի քաղաքի եւ հարակից շրջանների պաշտպանության կազմակերպման ընթացքում պաշտոնեական անփութություն կատարելու մեղադրանքով։

Ըստ ՔԿ-ի` գեներալ-լեյտենանտը 2020 թվականի հոկտեմբերի 30-ից մինչև նոյեմբերի 9-ը Շուշիի և հարակից շրջանների պաշտպանության կազմակերպման ընթացքում անփույթ վերաբերմունք է դրսևորել իր ծառայողական պարտականությունների նկատմամբ՝ չկատարելով եւ ոչ պատշաճ կատարելով դրանք, ինչը անզգուշությամբ առաջացրել է ծանր հետևանքներ։ Մեղադրանքի մյուս դրվագը վերաբերում է «Արեգա»՝ ազատագրված բարձունքը թողնելուն և նահանջելուն։
Հեղինակ՝ Իզաբել Սահակյան

Աղբյուր` Փաստինֆո