Փաստ ինֆո

ՀՀ չորրորդ նախագահ Արմեն Սարգսյանի՝ օտարերկրյա քաղաքացիության վերաբերյալ քրեական վարույթը քննչական ենթակայության կարգով ԱԱԾ-ից ուղարկվել է Քննչական կոմիտե։ ՀՀ քննչական կոմիտեից «Փաստինֆո»-ի հարցին ի պատասխան հաստատեցին, որ ստացել են գործը, նախաքննություն է իրականացվում։

Հիշեցնենք, որ Արմեն Սարգսյանի՝ օտարերկրյա քաղաքացիության վերաբերյալ տեղեկությունները և այդ հիմքով նրա պաշտոնավարման արգելքի վերաբերյալ քննարկումները եղել են դեռևս նրա պաշտոնավարման տարիների սկզբից, հետագայում, սակայն, աղմուկը մարել էր։ Արցախյան երրորդ՝ 44-օրյա պատերազմից հետո ՝ 2021 թվականին 53 փաստաբան հանցագործության մասին հաղորդում էր ներկայացրել՝ ՀՀ նախկին նախագահ Արմեն Սարգսյանի՝ երկքաղաքացիության փաստը թաքցնելու հետ կապված: Հատուկ քննչական ծառայությունը (ՀՔԾ) մերժել էր քրեական գործ հարուցելը, որի դեմ փաստաբաններով բողոք էին ներկայացրել:

Փաստաբանների պալատի նախկին նախագահ Արա Զոհրաբյանը տեղեկացրել էր, որ Գլխավոր դատախազությունը, բողոքի հիման վրա, վերացրել է ՀՔԾ որոշումը եւ հարուցել Է քրեական գործ՝ Քրեական օրենսգրքի 325 հոդվածի 1-ին մասի (փաստաթղթեր կեղծելը, իրացնելը կամ օգտագործելը) հատկանիշներով:

ՀՀ 4-րդ նախագահ Արմեն Սարգսյանը 2022թ. հունվարի 23-ին հրաժարական է տվել` պատճառաբանելով, թե նախագահը չունի անհրաժեշտ գործիքներ՝ երկրի և ազգի համար ներկայիս բարդ ժամանակներում ազդելու ներքին և արտաքին քաղաքական գործընթացների վրա։

Դրանից հետո Hetq.am-ն արդեն փաստերով հրապարակում ներկայացրեց, որ Սարգսյանը նախագահ ընտրվելու պահին ունեցել է Սենթ Քիթս և Նևիսի Հանրապետության քաղաքացիություն, և նա այդ պաշտոնում ընտրվելու իրավունք չուներ։

ԱԱԾ-ում քննվող քրեական վարույթը տևական ժամանակ «քնեցված» վիճակում է եղել, ապա, ինչպես պարզվեց, բոլորվին վերջերս տեղափոխվել ՔԿ։
Հեղինակ՝ Իզաբել Սահակյան

Աղբյուր` Փաստինֆո