Փաստ ինֆո

«Սա ահավոր իրողություն է և այս խնդիրը պետք է շտապ կարգավորվի։ Դրան կարելի է հասնել միայն միասնականության շնորհիվ՝ կոշտ, բայց ազնիվ բանակցություններով՝ Մոսկվայի, Վաշինգտոնի, Փարիզի և Երևանի հետ,- «Փաստինֆո» -ի հետ զրույցում ասաց Արցախի նախագահի խորհրդական Դավիթ Բաբայանը և հավելեց,- խոսքը Մինսկի խումբը համանախագահող երկրների մասին է։

Նրա արձանագրմամբ՝ Մինսկի խումբը չի լուծարվել, խմբում ընդգրկված երկրները շարունակում են առանձին – առանձին, ամեն մեկն իր ուղղությամբ ներգրավված մնալ հակամարտության կարգավորման գործընթացի մեջ։ «Բացի այդ՝ և՛ Ֆրանսիան, և՛ ԱՄՆ-ն որպես ժողովրդավարության բաստիոն երկրներ, ինչպես նաև ՄԱԿ-ի անվտանգության խորհրդի մշտական անդամներ, պետք է պատասխանեն՝ ժողովրդավարական երկրի օկուպացիան, այլ կերպ ասած՝ Ցեղասպանությունը տոտալիտար երկրի կողմից իրենց համար ընդունելի՞ է, թե՞ ոչ։ Ի վերջո, Մոսկվան, որ այստեղ խաղաղապահներ ունի, թող վերջապես պատասխանի՝ ինքը, ի վերջո, գարա՞նտ է, թե՞ գարանտ չէ, կարողանո՞ւմ է, թե՞ չի կարողանում կատարի իր աշխատանքը, որպեսզի մենք հասկանանք մեր անելիքը»,- ասում է Դավիթ Բաբայանը։

Հարցին՝ ի՞նչ հետևանքներ կունենա Հակարի կամրջի հարևանությամբ այսօր տեղադրված ցուցանակը, որ ազդարարում է կամրջից այն կողմ այլևս ադրբեջանապատկան տարածքի մասին, արդյո՞ք սրանով ադրբեջանական կողմը հոգեբանական ճնշում չի՞ գործադրի Արցախում ապրող մեր հայրենակիցների նկատմամբ Դավիթ Բաբայանը պատասխանում է՝ հոգեբանական ճնշումը մեղմ է ասված, դա Արցախում և Արցախում ապրողների նկատմամբ սպասվելիք գործողությունների աննշան, չերևացվող մասն է միայն.« Սա Ադրբեջանի կողմից Արցախը ոչնչացնելու, հայության վրա թքելու, Ռուսաստանի Դաշնության, Մինսկի խմբի համանախագահող երկրների և, առհասարակ, աշխարհի վրա թքելու ցուցանակ է, որովհետև թշնամին վստահ է իր անպատժելիության վրա»։

Ցուցանակի տեղադրումը արդյոք Ադրբեջանը չի օգտագործի որպես հիմք՝ Արցախում գտնվող մեր հայրենակիցների նկատմամբ բռնարարքներ իրականացնելու համար հարցին ի պատասխան՝ Դավիթ Բաբայանը ընդգծել է, որ միանշանակ և անպայման բռնանարքներ կլինեն։ Դրանք կլինեն առևանգման, մասսայական ձերբակալությունների և այլ տեսակի կտտանքների ձևով։ Սրանում թող որևէ մեկը կասկած չունենա, ասում է Արցախի նախագահի խորհրդականը։

Հարցին՝ արդյո՞ք ցուցանակի տեղադրումից հետո ադրբեջանական կողմը չի ստիպի, որ Արցախում ապրող մեր հայրենակիցները հրաժարվեն հայկական անձնագրերից, Դավիթ Բաբայանը պատասխանում է. «Մենք երբեք Ադրբեջանի կազում չենք լինելու։ Նորմալ հայն ու արցախցին պետք է առնվազն կենդանի լինեն, որպեսզի ադրբեջանական անձնագիր վերցնեն կամ ցանկանան իրենց համարել Ադրբեջանի քաղաքացի։ Եթե, նույնիսկ, ամբողջ աշխարհն ու հայությունը մեզանից հրաժարվի, մենք Ադրբեջանի կազմում ապրելու մտքի հետ չենք համաձայնի»։

Հիշեցնենք, որ այսօր ադրբեջանական կողմը Հակարիի կամրջի մոտ շինարարական աշխատանքներ է սկսել ու նոր տեղեկատվական ցուցանակ տեղադրել, որն ազդարարում է՝ «Դուք մուտք եք գործում Ադրբեջանի Հանրապետության տարածք»։

Աղբյուր` Փաստինֆո