Փաստ ինֆո

Բոլոր փակ ճանապարհները մի օր բացվում են և բաց ճանապարհները, երբ չկա հասկացվածություն, մի օր փակվում են։ Այս մասին այսօր լրագրողների հետ ճեպազրույցի ժամանակ նշեց ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանը։

Անդրադառնալով պաշտպանության նախկին նախարար Դավիթ Տոնոյանի հայտարարությանը՝ Քոչարյանը նշեց. «Ինքը պաշտպանության նախարար է եղել ու շատ հարցերի վերաբերյալ մե՛նք ունենք հարցեր։ Ովքեր եկել են Քննիչ հանձնաժողով, եկել են հարցերի պատասխանելու, չեն եկել մեզ հարցեր տալու»։

Նշենք, որ Տոնոյանը այսօր հայտարարություն էր տարածել, որ անկախ փորձագետների և ԱԺ ընդդիմադիր խմբակցությունների ներկայացուցիչների բացակայությունը ՔՀ նիստերին հարցեր է առաջացնում վերջինիս աշխատանքի անկողմնակալության վերաբերյալ։

Քոչարյանը հաստատեց, որ իրենց խմբակցության անդամ Վիլեն Գաբրիելյանը երկու անգամ այցելել է կալանավորված Տոնոյանին, քանի որ ընկերական ու բարեկամական կապեր ունեն։

Իսկ սահմանին ստեղծված իրավիճակի վերաբերյալ Անդրանիկ Քոչարյանն ընդգծեց՝ մենք չպետք է խոսենք պատերազմի մասին, փոխարենը պետք է փորձենք առկա հնարավորություններն օգտագոտրելով՝ խուսափել պատերազմից. «Լիակատար բլոկադայի մեջ էլ պետք է փորձենք և՛ ապրել, և՛ մտածել ազատագրման մասին։ Երբ դիմանում ես, հաղթում ես»։

Անդրանիկ Քոչարյանն իր խոսքը եզրափակեց այսպես. «Ամենակարևոր բանը եկեք արձանագրենք՝ էն, ինչ մերն ա, մերն ա, եթե կրակեն, կրակելու ենք, առաջ իրանք կրակում էին, մենք չէինք կրակում՝ պատերազմից հետո, իրենք գալիս էին, մենք լքում էինք տեղերը, եթե առաջ ավելի շատ զոհ ունեինք, հիմա էդպես չի» ։

Աղբյուր` Փաստինֆո