Փաստ ինֆո

Հաճախ եկեղեցում մոմ վառեք, Աստծուց ներում հայցեք։ ԱԺ ամբիոնից նման հայտարարությամբ է հանդես եկել ԱԺ «Քաղաքացիական պայմանագիր» խմբակցության պատգամավոր Էմմա Պալյանը՝ խոսքն ուղղելով Շիրակի թեմի առաջնորդ Գերաշնորհ Տեր Միքայել արքեպիսկոպոս Աջապահյանին։

Նշենք, որ ԱԺ-ն արտահերթ նիստում քննարկում էր «Հայաստանի Հանրապետության կառավարության եւ Ռուսաստանի Դաշնության կառավարության միջեւ Եվրասիական զարգացման բանկի վճարված կանոնադրական կապիտալում Ռուսաստանի Դաշնության մասնաբաժնի մասի առուվաճառքի մասին» համաձայնագիրը վավերացնելու մասին հարցը, որի ժամանակ իշխող խմբակցության պատգամավորը ամբիոնին մոտեցավ, սակայն ելույթը ոչ թե քննարկվող հարցին էր վերաբերում, այլ Շիրակի թեմի առաջնորդին։

Պատգամավորը նախ անդադարձավ Նիկոլ Փաշինյանի նախորդ շաբաթ հնչեցրած «հայտնի» հայտարարությանը՝ կապված կառավարություն-եկեղեցի հարաբերությունների հետ։ Նիկոլ Փաշինյանը մասնավորապես նշել էր, որ եթե եկեղեցու գործերը լավ չեն կառավարության հետ, ապա լավ չեն եկեղեցու հարաբերությունները Աստծո հետ։

«Այս ելույթից անմիջապես հետո բազմաթիվ սպառնալիքներ, վիրավորական խոսքեր են հնչելու իմ հասցեին, դրանք ո´չ ինձ վախեցնում են, ո´չ առավել ևս լռեցնում»,- ասաց Էմմա Պալյանն ու ավելացրեց. «Վարչապետի այս հայտարարությունից հետո որոշ եկեղեցականներ, քաղաքական գործիչներ, «գրպանային» լրատվամիջոցներ փորձել են սկանդալ ստանալ»։

Ապա անդրադարձավ Շիրակի թեմի առաջնորդ Միքայել արքեպիսկոպոս Աջապահյանի մեկնաբանություններին՝ այն որակելով քաղաքական կեցվածք։

Նրան, մասնավորապես, դուր չէր եկել արքեպիսկոպոսի հայտարարությունն առ այն, որ «այս իշխանությունները պատիժ են և երկիրը գցել են անդունդի մեջ. նախկին իշխանությունները ևս Աստծուց էին և եկեղեցին հաշտ է նրանց հետ»։

Պալյանը ընդծեց, որ նախկին իշխանությունները ընտրված չեն եղել և հետևաբար չէին կարող Աստծուց լինել, և դա է հիմնական տարբերակիչը իրենց և նախկինների միջև։

«Պարոն Աջապահյան, Ձեր տեղը եկեղեցում է, Ձեր խոսքը կլինի ընդունելի և հասկանալի միայն այն ժամանակ, երբ բացարձակ քաղաքական լինելուց զատ կլինի նաև հոգևոր, երբ Ձեր խոսքում կներառեք միավորման, ներման, հոգևոր ճանապարհով ելքեր գտնելու մասին կոչեր, իսկ մինչ այդ հաճախ եկեղեցում մոմ վառեք, Աստծուց ներում հայցեք»,-իր ելույթի վերջում նշեց Պալյանը։

Մանրամասները՝ տեսանյութում

Աղբյուր` Փաստինֆո