Փաստ ինֆո

Ադրբեջանցիների հետ գնալու, առաջ գալու վերաբերյալ դուք ընդհանրապես գործ չունեք: Այս մասին Ծիծեռնակաբերդում լրագրողների հետ զրույցում ասաց ՀՀ զինված ուժերի գլխավոր շտաբի պետ Էդուարդ Ասրյանը՝ անդրադառնալով Տեղում ադրբեջանցիների առաջխաղացմանը և հարցին, արդյոք ադրբեջանական զորքը դուրս եկե՞լ է Տեղ գյուղի տարածքից կամ որքան է հեռացել, որքան տարածք ենք կորցրել:

Դիտարկմանը, որ ադրբեջանցի զինծառայողները մտել են հայկական գյուղեր, Ասրյանը հայտարարեց՝ ոչ մի գյուղեր էլ չեն մտել:

Հարցին, որ ադրբեջանցիները հասել են անգամ Սիսիանի գյուղեր, Ասրյանն արձագանքեց՝ նշելով. «Դուք ռազմական գործից ոչ մի բան չեք հասկանում, ռազմական գործի մեջ լինում են իրադրություններ, երբ հակառակորդի ստորաբաժանումը կարող է հայտնվել նաև մեր տարածքում, մեր ստորաբաժանումը հայտնվել իրենց տարածքում: Այս պարագայում կա համապատասխան գործողությունների սխեմա, մտահղացում, որի համաձայն գործում ենք»:

Իսկ թե քանի կմ են ադրբեջանցիները առաջ եկել Տեղ գյուղի հատվածում՝ Ասրյանը հորդորեց զինվորականին հարցեր չտալ՝ քանի «կիլոմետր», «հեկտար», զինվորականն ունի հենակետ, շրջան, դիրք:

«Մենք կանգնած ենք Տեղի մատույցներում մեր համապատասխան տարածքի վրա և իրականացնում ենք դիրքային բարելավման աշխատանքներ: Ինչ վերաբերում է մյուս հարցերին, թե ինչքան ենք տարել, ինչքան ենք բերել, պաշտոնական լրահոսին հետևեք: Ադրբեջանցիները տեղակայված են մեր ստորաբաժանումների, բնագծերի դիրքերի դիմաց»,- հայտարարեց Ասրյանը:

Աղբյուր` Փաստինֆո