Փաստ ինֆո

Միայն Սոթքը չեն թիրախավորում, եթե Սոթքում զոհ ենք ունեցել, դա չի նշանակում, որ միայն Սոթքն են թիրախավորում: Մեր սահմանագծում իրադրությունը հարաբերականորեն կայուն է: Այս մասին լրագրողների հետ զրույցում ասաց ՊՆ փոխնախարար Արման Սարգսյանը՝ հավելելով, որ նույն վիճակն է, եթե որևէ փոփոխության ենթարկվի, հանդես կգան համապատասխան հայտարարությամբ։

Ինչ վերաբերում է Տեղ գյուղում տիրող իրավիճակին, հարցին արդյո՞ք ադրբեջանական զորքերը հետ քաշվել են, Սարգսյանը նշեց, որ Տեղ գյուղի հետ կապված ամբողջ տեղեկատվությունը տրամադրվել է և այդ հատվածում որևէ փոփոխություն տեղի չի ունեցել, որևէ փոփոխություն լինելու դեպքում տեղեկատվություն կտրամադրվի:

Հարցին՝ արդյո՞ք կարելի է ասել, որ առնվազն Տեղում սահմանազատման աշխատանքներ իրականացվում են, Սարգսյանը փաստացի հաստատեց սահմանազատման աշխատանքների իրականացումը՝ մասնավորապես նշելով, որ մեծ հաշվով սահմանազատման աշխատանքներն իրականացվում են համապատասխան միջգերատեսչական հանձնաժողովի կողմից, որը հենց սահմանազատման, սահմանագծման աշխատանքներով է զբաղվելու. «Ե՛վ սահմանապահներ կան այդ հատվածում, և՛ ԶՈՒ ներկայացուցիչներ»։

Ինչ վերաբերում է Ադրբեջանի կողմից նոր ագրեսիայի համար հող նախապատրաստելուն, Սարգսյանն ասաց, թե վստահաբար չի կարող պնդել դա, միևնույն ժամանակ նշեց, որ պետք է ամեն մեկս մեր տեղում ավելի զգոն լինենք ու ամեն ինչ անենք, որպեսզի յուրաքանչյուր ոք իր աշխատանքը կատարի որակով՝ և՛ կահավորման, և՛ ինժեներական, և՛ ամրաշինական, ինչպես նաև մեր զորքերի մարտունակությունը բարձրացնելու ուղղությամբ համապատասխան աշխատանքներ տարվում են։

Աղբյուր` Փաստինֆո