Փաստ ինֆո

Լոնդոնի բարձր դատարանը հասարակական, քաղաքական գործիչ Նատալյա Ռոտենբերգին, ձերբակալելու որոշում է կայացրել, քանի որ նա հրաժարվել է վճարել ամուսնալուծության գործով փաստաբաններին, ինչպես նաև չի ներկայացել դատարան: Այս մասին հայտնում է բրիտանական The Telegraph պարբերականը՝ հիշեցնելով, որ նա նախկինում եղել է ՌԴ նախագահ Վլադիմիր Պուտինի մտերիմ ընկերոջ, ձյուդոյի «սփարինգի» ընկեր, օլիգարխ Արկադի Ռոտենբերգի կինը:

Ռոտենբերգը վեճի մեջ է «Candey» իրավաբանական գրասենյակի հետ, որի փաստաբաններին չի վճարել մատուցված համապատասխան ծառայությունների համար և այժմ Candey-ն նրանից պահանջում է 11 500 ֆունտ ստերլինգ: Ըստ հրապարակման՝ Լոնդոնի Բարձր դատարանն արձանագրել է, որ Նատալյա Ռոտենբերգն անտեսել է այն բոլոր նամակաները, էլեկտրոնային հաղորդագրություններն ու «WhatsApp» հավելվածով ուղարկված հաղորդագրությունները, որոնցում իրենից պահանջել են ներկայանալ դատարան: Բացի այդ, Ռոտենբերգը որևէ կերպ չի արձագանքել նաև իրավաբանական ընկերությունում՝ իր հետ կապ հաստատելու փորձերին։

The Telegraph-ը մանրամասնում է, որ նախորդ երկու լսումներին (նոյեմբերին և մարտին) չներկայանալու համար դատավոր Էնդրյու Ռիչին Ռոտենբերգին արդեն դատապարտել էր 21-օրյա ազատազրկման, սակայն կինը հնարավորություն է ունեցել խուսափելու ազատազրկումից, եթե դատական նիստին ներկայանար նախորդ հինգշաբթի՝ ապրիլի 20-ին, սակայն այդ օրը նորից դատարան չներկայանալու պատճառով դատարանը վճռել է, որ Նատալյա Ռոտենբերգը պետք է վճարի բոլոր ծախսերը, ինչպես նաև կարգադրել է, որ Ռոտենբերգի ձերբակալության օրդեր տրվի:

Նշենք, որ Ռոտենբերգը ավելի վաղ հայտնել էր Երեւանի ընտրություններին մասնակցելու իր մտադրության մասին. նրա թեկնածությունը ծրագրվում էր առաջադրել  ներկայիս ամուսնու՝ Տիգրան Արզաքանցյանի հիմնադրած կուսակցության կողմից։

Աղբյուր` Փաստինֆո