Փաստ ինֆո

Հայաստանն Արցախին միացնող հատվածում՝ Հակարի գետի կամրջի վրա ադրբեջանական անցակետի տեղադրումով, ըստ էության, կազմալուծվում է 2020թ․ նոյեմբերի 9-ի համաձայնագիրը։ Այդ քայլը լուրջ հարված է ոչ միայն մեզ, այլև Ռուսաստանի դաշնությանը։ Իրավիճակը հասել է մի կետի, որ շատ արագ թե՛ մենք, թե՛ Ռուսաստանը, որը ստանձնել է Արցախում խաղաղապահի առաքելությունը, կտրուկ ու պատասխանատու որոշումներ պետք է կայացնենք։ «Փաստինֆո»-ի հետ զրույցում այդ տեակետը հնչեցրեց Արցախի նախագահի հատուկ հանձնարարությունների գծով ներկայացուցիչ Դավիթ Բաբայանը։

«Անհասկանալի իրադարձություններ են կատարվում․ ի՞նչ է նշանակում ադրբեջանական անցակետ տեղադրել Լաչինի միջանցքում, որը գտնվում է ռուս խաղաղապահների վերահսկողության տակ և դա ամրագրված է 2020թ․ եռակողմ փաստաթղթով։ Վաղն էլ Կրեմլո՞ւմ է Ադրբեջանն անցակետ տեղադրելու և դա մարսելու։ Եթե միջազգային խաղացողները՝ այդ թվում Ռուսաստանը, մտածում են, թե կարող են Արցախն օգտագործել ու դեն գցել, ապա սխալվում են։ Մենք չենք կարող թույլ տալ, որ այդպես պատվազրկեն մեզ, ոչ էլ պատրաստվում ենք հնազանդվել Արդբեջանի դրած պահանջներին։ Անդառնալի իրադարձություններ կարող են լինել, եթե շատ արագ ազգովի ոտքի չկանգնենք և ցույց չտանք, թե ով ենք մենք որպես ազգ ու ինչ ենք կարող անել Արցախը փրկելու համար»,-ասաց Բաբայանը։

Շեշտելով տարբեր երկրների անվտանգության հարցում Արցախի ունեցած կարևոր դերակատարումը՝ Բաբայանը նկատեց՝ որևէ մեկը նման կերպ Արցախի հետ վարվելու իրավունք չունի ու, եթե հանկարծ արցախահայության հետ մի բան պատահի, ապա այս ամբողջ ընթացքում Ադրբեջանի հանցանքները չտեսնելու տված միջազգային հանրությունը պապանձվելու, որևէ գործուն քայլով Ադրբեջանին չսանձելու համար պատասխան է տալու։

«Իրավիճակը փրկելու մի փոքր հնարավորություն դեռ ունենք և դա կարող ենք անել ազգովի շատ արագ ձևակերպելով մեր ուզածը և որոշում կայացնելով։ Ինչպես շեշտեցի, կտրուկ որոշումներ ու քայլեր պետք է անի նաև ՌԴ-ն, բայց, եթե նա դա չի անում, ուրեմն մենք չպետք է սպասենք․ ժողովրդի կամքը, ինչպես հարկն է, պետք է արտահայտվի»,-շեշտեց Բաբայանը՝ հավելելով, որ Ադրբեջանը պատահականորեն չի հենց ապրիլի 23-ին անցակետ տեղադրել Լաչինի միջացքում․ նա այդ քայլով նաաև միջազգային հանրությանը, ՌԴ-ին է ուղերձնել հղել։

Ցավով արձանագրելով միջազգային իրավապաշտպան կազմակերպությունների անտարբերությունն արցախահայության նկատմամբ Ադրբեջանի կողմից իրականացվող ցեղասպան քայլերին՝ Դավիթ Բաբայանը շեշտում է՝ երկակի ստանդարտներ կիրառելու համար շատ են փոշմանելու։

Բաբայանը նկատում է՝ սոցիալական ու տարբեր այլ խնդիրների համար Երևանի փողոցներ դուրս եկող ակտիվիստները, զանազան կառույցների ու կազմակերպությունների ներկայացուցիչները ևս հանցավոր լռություն են պահպանում այն դեպքում, երբ Արցախը գոյաբանական վտանգի առաջ է կանգնած արդեն ավելի քան 4 ամիս։

Աղբյուր` Փաստինֆո