Փաստ ինֆո

Երևանի ընդհանուր իրավասության դատարանում՝ դատավոր Արտուշ Գաբրիելյանի նախագահությամբ, այսօր կայացել է 44-օրյա պատերազմի մեկնարկի նախօրեին խնջույք կազմակերպելու և առաջնագծում հակառակորդի կուտակումների մասին տեղեկանալուց հետո անձնակազմին մարտական պատրաստության չբերելու, պատշաճ պաշտպանություն չիրականացնելու մեջ մեղադրվող Մատաղիսի զորամասի հրամանատար Սևակ Աբրահամյանի գործով դատական նիստը։

«Փաստինֆո»-ի թղթակցի հաղորդմամբ՝ դատական նիստին ներգրավվեց նոր հանրային մեղադրող՝ զինվորական դատախազ Հայկ Ռափյանը, ինչից հետո շարունակվեց նախորդ նիստին  պաշտպանության կողմի ներկայացրած՝ Սևակ Աբրահամյանի նկատմամբ քրեական հետապնդումը դադարեցնելու և քրեական վարույթը կարճելու միջնորդության քննարկումը։

Նշենք, որ պաշտպան Արման Թամրազյանը միջնորդությունը ներկայացրել էր՝ հիմքում դնելով քրեական օրենսգրքի փոփոխությամբ պայմանավորված արարքի ապաքրեականացումը։ Մասնավորապես, նախկին քրեական օրենսգրքի 365-րդ հոդվածի 3-րդ մասը, որով մեղադրանքն ի սկզբանե ներկայացվել էր Աբրահամյանին և որը համապատասխանեցվել է գործող օրենսգրքի 540-րդ հոդվածի 5-րդ մասին, պատասխանատվություն էր նախատեսում մարտական հերթապահության կամ մարտական ծառայություն կրելու կանոնները խախտելու համար, որը կատարվել է ինչպես դիտավորությամբ, այնպես էլ անզգուշությամբ, մինչդեռ, գործող օրենսգրքով, ըստ պաշտպանի, եթե նշված չէ, որ արարքն անզգուշությամբ է կատարվել, ապա այն համարվում է դիտավորությամբ կատարված և այդ պատճառաբանությամբ պաշտպանության կողմը գտնում է, որ մարտական հերթապահության կամ մարտական ծառայություն կրելու կանոնների անզգույշ խախտումը ապաքրեականացվել է։ Նախորդ նիստին միջնորդության դեմ առարկել էր հանրային մեղադրող Վազգեն Վարդանյանը։ Նրա առարկություններին այսօրվա նիստին միացավ Հայկ Ռափյանը։

Դատարանը, լսելով կողմերի դիրքորոշումը, մերժեց միջնորդությունը, ինչից հետո անցավ Սևակ Աբրահամյանի նկատմամբ ընտրված խափանման միջոցի՝ կալանավորման,  փոփոխման կամ երկարացման հարցի քննարկմանը։

Մեղադրող կողմը միջնորդեց անփոփոխ թողնել Սևակ Աբրահամյանի  կալանավորումը՝ արձանագրելով, որ գործով դատակոչված է ավելի քան 50 վկա, որոնք հարցաքննված չեն, եւ դատավարության այս փուլում մեղադրյալը, գտնվելով ազատության մեջ, կարող է խոչընդոտել քննությանը։

Պաշտպանության կողմն առարկեց, մեղադրյալ Սևակ Աբրահամյանը հայտարարեց, որ չի խոչընդոտելու գործի քննությանը, ավելին՝  չի հասկանում, թե ինչում են իրեն մեղադրում.«Գործը կարդում եմ՝ ուրիշ մարդու մասին ա գրված» ։ Իսկ նրա պաշտպանը միջնորդեց Աբրահամյանի նկատմամբ կիրառել այլընտրանքային խափանման միջոց։ Դատարանը որոշեց անփոփոխ թողնել Աբրահամյանի կալանքը՝ երկարացնելով այն ևս երեք ամսով։ Դատական նիստը հետաձգվեց։

Հիշեցնենք, որ մեկ տարի առաջ Արցախի Մարտակերտի շրջանի Թալիշ և Մատաղիս գյուղերի պաշտպանությունը պատշաճ չկազմակերպելու մեղադրանքով բարձրաստիճան սպա էր կալանավորվել: Ըստ մեղադրանքի՝ հրամանատար Սևակ Աբրահամյանը պատերազմի մեկնարկի նախորդ օրը բանակի շուրջ 100 սպաների մասնակցությամբ կազմակերպել է խնջույք, որի ընթացքում թեև տեղեկատվություն է ստացել, որ առաջնագծում հակառակորդի կուտակումների կան եւ պատերազմի վտանգը մեծ է, անձնակազմին մարտական պատրաստություն չի բերել եւ ոչինչ չի արել հակառակորդի հարձակումը կանխելու, դրան դիմագրավելու համար:

Բացի այդ` գնդապետը հարձակման պահին նույնպես չի կատարել իր պարտավորությունները, անգործություն է դրսեւորել, ինչի հետեանքով ադրբեջանական կողմը ժամերի ընթացքում կարողացել է ճեղքել պաշտպանական գիծն ու մխրճվել թիկունքային հատվածներ: Այդ պայմաններում հայկական կողմը չի կարողացել պաշտպանության անցնել, ինչը հանգեցրել է նրան, որ ադրբեջանական կողմը գրավել է գերիշխող բարձունքները եւ հրամանատարական դիտակետերը, մխրճվել պաշտպանության խորքը` զորամասի անձնակազմին ստիպելով նահանջել: Դրա հետևանքով հակառակորդի վերահսկողության տակ են անցել Մարտակերտի շրջանի Թալիշ եւ Մատաղիս գյուղերը: Քրեական գործն ի սկզբանե գտնվել է Սյունիքի մարզի ընդհանուր իրավասության դատարանի դատավոր Մուշեղ Արամյանի վարույթում, ապա տեղափոխվել Երևան և այժմ գտնվում է դատավոր Արտուշ Գաբրիելյանի վարույթում։

Հեղինակ՝ Իզաբել Սահակյան

Աղբյուր` Փաստինֆո