Փաստ ինֆո

ՀՀ վարչապետ Նիկոլ Փաշինյանն այսօր ԱԺ ամբիոնից անդրադարձավ նախորդ բանակցություններին մասնակցություն ունեցած անձանց հետ չհանդիպելու աորձանագրումներին։

«Հիմա էլ ասում են՝ այն ժամանակ ինչո՞ւ չեք հանդիպել բանակցած մարդկանց հետ, խորհրդակցել: Հանդիպել ենք, և առաջին հայացքից առաջին տպավորությունը եղել է այն, որ այս մարդկանց թվում է, թե մենք միամիտ ենք: Կամ, կներեք, ինչո՞ւ պիտի բանակցային արդյունքների մասին հանդիպումներով իմանայինք: Սա պետությո՞ւն չէ, ո՞ւր է բանակցությունների ընթացքը՝ արձանագրված Արտաքին գործերի նախարարությունում: Ցաքուցրիվ, դարակների տակից, սառնարանի ոտքի տակից մի երկու թուղթ ենք գտել, իրար կպցրել: Այսինքն՝ մենք տառաճանա՞չ չենք, չենք կարողանո՞ւմ կարդալ»,- ասել է Նիկոլ Փաշինյանը, ապա ավելացրել. «կամ եթե նույն Սերժ Սարգսյանը, նույն Վարդան Օսկանյանը, մյուսները բան ունեին ասելու, այդ ինչպե՞ս է՝ Սերժ Սարգսյանն ինձ մոտ մարդ էր ուղարկում, ասում էր՝ գիտես ինչ, տանս հարցը լուծի, չէր կարողանում լուր ուղարկել, որ Ղարաբաղի հարցում, գիտես, այսպիսի բաներ կան»:

Նիկոլ Փաշինյանի խոսքով՝ Լեռնային Ղարաբաղի նախագահ Բակո Սահակյանը գալիս էր, իր հետ սուրճ խմում՝ նույն տեղը ամիսներ, տարիներ, գնում էր, իր հետ էր սուրճ խմում: «Ինձ ասում էր, որ գնում է այնտեղ, իրեն էլ ասում էր, որ գալիս է: Թող գրեր, անստորագիր գրեր, լուր ուղարկեր: Օսկանյանն իբր այն ժամանակ բան պիտի ասեր, ասում եմ՝ թող հիմա ասի: Ասում է՝ պիտի ասեի, որ կամ 5 շրջանը տուր կամ 7-ը կամ 4-ը կամ 3-ը: Այն ժամանակ ասեիք, հրապարակային ասեիք, երկուսդ էլ ասեիք, ասեիք՝ վեր կաց և հողերը հանձնի: Ինչո՞ւ չէիք ասում: Իսկ ինչո՞ւ էիք ասում՝ եկել է՝ հողերը տա, հողերը տալիս է, եկել է՝ հողերը տա: Ասեիք՝ լսի, հազիվ եկել ես, հազիվ լեգիտիմ ես, տուր հողերը, տուր հողերը: Դժվա՞ր էր այդ ամեն ինչն անել»,- ԱԺ ամբիոնից ասել է Նիկոլ Փաշինյանը:

Աղբյուր` Փաստինֆո