Փաստ ինֆո

Մենք կարծում ենք, որ ունենք բավարար լեգիտիմություն, բավարար մանդատ՝ Հայաստանի Հանրապետության ապագային վերաբերող որոշումներ կայացնելու: ԱԺ ամբիոնից հայտարարել է ՀՀ վարչապետ Նիկոլ Փաշինյանը։

«Այստեղ ասում են՝ գնալու է, այս է ստորագրելու, այն է ստորագրելու: Կրկին եմ ասում՝ եթե բանը հասնի այնտեղ, որ թուղթը հասել է այն կետին, որ ստորագրենք, թե չստորագրենք, դա վատ նորություն չէ, դա լավ նորություն է»,- ասել է Նիկոլ Փաշինյանն ու ավելացրել «Ես ուզում եմ հիշեցնել 2020 թվականի նոյեմբերի 9-ի եռակողմ հայտարարության պատմությունը. հիշո՞ւմ եք՝ որքան ինչ ասես ասեցիք, ոտքի տակ տվեցիք նոյեմբերի 9-ի այդ հայտարարությունը: Այդ նոյեմբերի 9–ի հայտարարությունը մեր երազած հայտարարությունը չէր, բայց այսօր մենք ինչի մասին խոսում ենք, ինչ ասում ենք՝ մեր դիրքորոշումը իրավականորեն Լաչինի միջանցքի հետ կապված, Լեռնային Ղարաբաղի հետ կապված, Լեռնային Ղարաբաղի շփման գծի հետ կապված, տարածաշրջանային կոմունիկացիաների հետ կապված, գերիների հետ կապված, ամեն ինչը հիմնավորում ենք նոյեմբերի 9-ի եռակողմ հայտարարությամբ»:

Ըստ նրա՝ այդ հայտարարությունը կյանքի չի կոչվում, եւ սա է պատճառը, որ այսօր պնդում են, որ խաղաղության պայմանագրի մեջ պետք է լինեն մեխանիզմներ, որոնք բացառեն նման իրավիճակը: «Ասում եք՝ ինչի՞ մասին եք բանակցում, ամեն ինչի մասին ասել եմ իմ ելույթում, կետ-կետ, ասել եմ մեր դիրքորոշումների և պրոբլեմների մասին, որոնք կան: Բայց ձեզ ասեմ՝ այն թուղթը, որը ձեզ առաջարկում ենք, կարող ենք ցույց տալ այդ թուղթը, երբ մենք ուղարկել ենք ադրբեջանական կողմին, նույն պահին ես պատրաստ եմ, այսօր էլ եմ պատրաստ մեր ուղարկած թուղթը ստորագրել: Այլ բան, որ Ադրբեջանը չի ընդունում մեր ուղարկած թուղթը, և հետևաբար, պետք է որոշել՝ ինչ անել»,- ասել է Փաշինյանը:

Նա հայտարարել է, որ, իրենց կարծիքով, ունեն բավարար լեգիտիմություն, բավարար մանդատ՝ Հայաստանի Հանրապետության ապագային վերաբերող որոշումներ կայացնելու: «Եթե դուք ցանկանաք, մենք այդ որոշումների մեջ կլինենք լիակատար թափանցիկ ձեզ համար՝ որպես խորհրդարանական ուժ: Բայց, ցավոք, չենք կարող ուղիղ եթերում լինել թափանցիկ, կարող ենք աշխատանքային մակարդակում լինել թափանցիկ»,- ասել է Փաշինյանը:

Բոլոր դեպքերում շնորհակալ եմ այս քննարկման համար: Պիտի խոստովանեմ, որ այս քննարկումն իմ լավատեսությունը մեծացրեց՝ իր բոլոր դժվարություններով և պրոբլեմներով, որովհետև այս փուլում լավատեսությունը մեզ շատ անհրաժեշտ է, նույնքան էլ վճռականությունը, իմաստությունը, ճկունությունը, կայունությունը: Եվ ես ուզում եմ խորհրդարանական մեծամասնությանը շնորհակալության հայտնել՝ Հայաստանի Հանրապետության կայունությունը, ինքնիշխանությունը, պետականությունը պահպանելու դիրքերում ամուր կանգնած լինելու համար:

Աղբյուր` Փաստինֆո