Փաստ ինֆո

Հակակոռուպցիոն դատարանում՝ դատավոր Կարապետ Բադալյանի նախագահությամբ, այսօր կայացել է ՀՀ նախկին վարչապետ Հովիկ Աբրահամյանի՝ ենթադրյալ ապօրինի գույքի բռնագանձման պահանջով դատախազության հայցի քննությունը։

«Փաստինֆո»-ի թղթակցի հաղորդմամբ՝ մինչ հայցի բուն քննությանն անցնելը Հովիկ Աբրահամյանի փաստաբան Վարազդատ Ասատրյանը նախագահող դատավորին ինքնաբացարկի միջնորդություն ներկայացրեց՝ կասկածի տակ դնելով դատավորի անկողմնակալությունը, քանի որ փաստաբանի պնդմամբ՝ դատարանը չի հետաձգել քննությունը նոր ներկայացուցչի ներգրավման հիմքով, չի երկարացվել հայցադիմումի պատասխանի ժամկետը, որով խախտվում է կողմերի հավասարության սկզբունքը: Միջնորդությունը, սակայն քննարկման առակա չդարձվեց, թողնվեց առանց քննության, քանի որ Քաղաքացիական դատավարության օրենսգրքի համաձայն՝ դատական նիստում գրավոր միջնորդություն ներկայացրած անձը պարտավոր է դատական նիստին ներկա, գործին մասնակցող մյուս անձանց տրամադրել միջնորդության և դրան կից փաստաթղթերի պատճենները: Նկատի ունենալով, որ այդ պահանջը չի պահպավել, դատարանը որոշել է առանց քննության թողնել միջնորդությունը, իսկ դրա վերաբերյալ Աբրահամյանի ներկայացուցիչներին՝ հայտարարությամբ հանդես գալու և դատարանի գործողությունների դեմ առարկելու հնարավորություն դատարանը չտվեց՝ նշեկով, որ Քաղաքացիական դատավարության օրենսգիրքը նման հնարավորություն չի տալիս։

Դատախազ Տիգրան Ենոքյանը ներկայացրեց հայցի հիմքն ու առարկան։ Դատախազությունը բռնագանձման պահանջ է ներկայացրել 59 միավոր գույքի նկատմամբ, ինչպես նաև՝ 26 մլրդ դրամ։ Դատախազի փոխանցմամբ՝ Հովիկ Աբրահամյանի և նրան փոխկապակցված անձանց գույքի ուսումնասիրության ժամանակահատվածը սկսվել է 1995թ.։ Ըստ դատախազության՝ Աբրահամյանի կողմից ձեռքբերված գույքը չի հիմնավորվում օրինական եկամուտներով։

59 գույքից 15-ը Երևան քաղաքում է, հիմնականում՝ Կենտրոն վարչական շրջանում, 12-ը՝ Արարատի մարզի Մխչյան համայնքում, 10-ը՝ նույն մարզի Նարեկ գյուղում, 1-ական գույք՝ Մարմարաշեն, Այնթապ և Արևաբույր համայնքներում, 2-ը՝ Կոտայքի մարզի Արզական գյուղում, 6-ը՝ Ծաղկաձոր համայնքում, 1-ը՝ Ջերմուկ համայնքում, 1-ը՝ Սևան համայնքում, 6-ը՝ Դիլիջան համայնքում, 3-ը՝ Կոտայքի մարզի Մեղրաձոր համայնքում: Գույքերից 23-ը հաշվառված է ընտանիքի անդամ չհանդիսացող, այլ անձանց անվամբ, սակայն գույքերի իրական շահառուն, ըստ դատախազության, Հովիկ Աբրահամյանն է: Բացի այդ, դատախազությունը պահանջում է բռնագանձել նաև 4 ավտոմեքենա, ինչպես նաև՝ դրամական պահանջ է ներկայացվել՝ ընդհանուր առմամբ մոտ 26 մլրդ դրամի չափով։ Դատախազությունը լրացրեց հայցի առարկան, դրան ծանոթանալու համար պատասխանող կողմին ժամանակ տրվեց, ըստ այդմ, դատական նիստը հետաձգվեց՝ մինչև մայիսի 16-ը։

Դատական նիստին Հովիկ Աբրահամյանը չի մասնակցել։

Հեղինակ՝ Իզաբել Սահակյան

Աղբյուր` Փաստինֆո