Փաստ ինֆո

Շրջափակված Արցախից այնտեղ ապրող արցախցու զրկանքների, Ադրբեջանի ապօրինի գործողությունների հետևանքով արցախցու ոտնահարված իրավունքների մասին աշխարհին պատմողներից մեկը Գևորգ Իսկաջյանն է։ Գևորգը ԱՄՆ-ում մեծացած, բայց երբևէ հայրենիքի ու արմատների հետ կապը չխզած երիտասարդներից է, Արցախ է տեղափոխվել մեկ տարի առաջ՝ հստակ նպատակով՝ Արցախի մասին աշխարհին պատմելու հաստատակամությամբ։

«2021թ․ որոշեցինք Հայ Դատի գրասենյակ բացել Արցախում, քանի որ գիտակցում էինք՝ դժվար ժամանակներ են սպասվում։ Գրասենյակը բացելուց հետո զգացինք, որ անգլախոս լսարանի հետ ակտիվ աշխատելու խնդիր ունենք․ սենատորներին, կոնգրեսականներին, արտասահմանյան լրատվամիջոցների ներկայացուցիչներին հասցնելն էր պետք Արցախում տիրող իրավիճակը, Ադրբեջանի առաջացրած տարատեսակ խնդիրները։ Երբ ինձ առաջարկեցին տեղափոխվել Արցախ ու զբաղվել այդ գործով, անմիջապես համաձայնվեցի։ Ապրելով այստեղ ու անձամբ շփվելով իմ հայրենակիցների հետ՝ ավելի շատ բան ստանում եմ, քան տալիս եմ»,- «Փաստինֆո»-ի հետ զրույցում անկեղծանում է Գևորգը։

Հայ Դատի գրասենյակի աշխատանքն է՛լ ավելի արդիական դարձավ 2022թ․ դեկտեմբերի 12-ից հետո, երբ Ադրբեջանը կտրեց Արցախը Հայաստանից ու արտաքին աշխարհից՝ փաստացի արտասահմանցի լրագրողներին ևս զրկելով Արցախի ժողովրդի հանդեպ իրականացվող անմարդկային գործողություններն արձանագրելու հնարավորությունից։

Արդեն շուրջ մեկ տարի կամուրջ ապահովելով Արցախի ու արտաքին աշխարհի միջև՝ Գևորգը հույս ունի, որ միջազգային հանրությունն ու խոշոր դերակատարներն ինչ-որ պահի կսանձեն Ադրբեջանին, որն ավելի քան 4 ամիս է՝ 120 հազար արցախահայությանը լիակատար շրջափակման մեջ է պահում։

«Մեր ռեսուրսները շատ քիչ են՝ Ադրբեջանի համեմատ, բայց եղածն էլ ամբողջությամբ չենք օգտագործում։ Արցախում հրաշալի ֆիլմարտադրողներ, վավերագրողներ ու լրագրողներ կան․ նրանց աշխատանքն արտաքին լսարանին ներկայացնելու խնդիր ունենք։ Ամենակարևորն այն է, որ աշխարհին ներկայացվի Արցախի պատմությունը, արցախցու կյանքը։ Դրանում մեծ դերակատարում կարող են ունենալ Սփյուռքի մեր երիտասարդները։ Նրանց ու Արցախի մեր հայրենակիցներին կապել է պետք, հաամգործակցության հնարավորություն տալ։ Նաև սոցիալական ցանցերի արցախցի օգտատերերը կարող են այդ գործին մեծապես օգնել՝ տարածելով իրենց առօրյան, դժվարությունները ներկայացնող նյութեր»,-վստահեցնում է Գևորգը։

Արցախից արտասահմանցի լրագրողների հետ աշխատելու շուրջ մեկ տարվա ընթացքում հայրենադարձված երիտասարդը համոզվել է՝ դրսում շատերն են հասկանում, պատկերացնում, թե ինչ է կատարվում Արցախում․ այլ հարց է, որ Ադրբեջանն ամեն ինչ անում է՝ իր համար անցանկալի արձագանքներն ու քայլերը չեզոքացնելու համար։

«Մեկ ամիս առաջ Ադրբեջանը արտասահմանցի լրագրողներ էր բերել Լաչինի միջանցք, որ ցույց տա, թե, իբր, Ադրբեջանի կառավարությունը կապ չունի միջանցքը փակելու հետ, այսպես կոչված, «էկոակտիվիստներն» են այդպես որոշել ու արել։ Այդ լրագրողներից որոշների հետ ես ևս զրուցել եմ, վստահեցրել, որ Արցախի շրջափակումը ծրագրել ու իրագործում է Ադրբեջանի կառավարությունը։ Ճիշտ է, Ադրբեջանը կաշառում է արտասահանցիներին, որ հակաադրբեջանական ելույթներ, հրապարակումներ չանեն, բայց հավատացեք, որ մարդիկ, ամեն դեպքում, ընկալում են իրականությունը։ Ում հետ զրուցել եմ, նրանց առնվազն 80 տոկոսը հասկանում է, թե ինչ է կատարվում իրականում»,-ասում է Գևորգն ու ուրախությամբ հավելում՝ եթե պատերազմի օրերին միջազգային լրատվամիջոցների ներկայացուցիչներն առավելապես չեզոք էին, ապա շրջափակումից հետո ակնհայտորեն դատապարտում են Ադրբեջանին։

«Մենք պետք է հասկանանք՝ տեղեկատվական պատերազմը ևս մեր փոխարեն ոչ ոք չի վարելու։ Այս դաշտում հապաղելու ժամանակ չունենք»-ասում է հայրենադարձված երիտասարդն ու վստահեցնում՝ Արցախի, Հայաստանի ու Սփյուքի ներուժը միատեղելու դեպքում որոշ ժամանակ անց արդյունքը տեսանելի կլինի։

Աղբյուր` Փաստինֆո