Փաստ ինֆո

Անընդունելի է, մերժելի է մոտեցումը՝ տարրալուծել «Հայ եկեղեցու պատմություն» առարկան այլ առարկաների մեջ կամ սահմանափակել 1 կամ 2 դասարանում դասավանդելով։ Այսօր տեղի ունեցած ճեպազրույցում այս մասին ասել է Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոս Գարեգին Բ-ն։

«Փաստինֆո»-ի հաղորդմամբ՝ օրեր առաջ Վեհափառն ընդունել էր ԿԳՄՍ նախարարին ու Երեւանի քաղաքապետի տեղակալ Ավինյանին, ինչը միանշանակ չէր ընդունել հանրության տարբեր շրջանակների կողմից։

«Մայր Աթոռ Սուրբ Էջմիածինը յուրաքանչյուր հայորդու տունն է։ Ամեն անձ այցելում է Մայր Աթոռ, և եթե խնդիրներ կան, հարցեր կան, նաև հանդիպումներ է ունենում Ամենայն հայոց հայրապետի հետ, եթե դրանք վերաբերում են Ամենայն հայոց հայրապետին և նրա տնօրինության տակ են այդ հարցերի լուծումները»,- ասել է Վեհափառը։ Նրա փոխանցմամբ՝ կրթության նախարարի հետ հանդիպմանը անդրադարձել են «Հայ եկեղեցու պատմություն» առարկային, որը տարալուծվում է «Հայ ժողովրդի պատմություն» և այլ առարկաների մեջ, որը ճիշտ չեն գտնում, և որին հստակ ժխտական դիրքորոշում են արտահայտել են:

«Այս օրերին էլ, անշուշտ, մեր հոգևորականների կողմից այդ խնդրին անդրադարձ եղավ, իրենք նույնպես արտահայտեցին վերաբերմունքը մեր և մեր սուրբ եկեղեցու, և, կարծում եմ, մեր հավատավոր ժողովրդի: «Հայ եկեղեցու պատմություն» առարկան միայն գիտելիքների փոխանցում չէ, այն ոգի, նկարագիր, ինքնություն, գիտակցություն, արժեհամակարգ կերտող դասընթաց է: Հնարավոր է, որ այսօր այդ դասագրքերը ճիշտ կազմված չլինեն, թեմաները ճիշտ ներկայացված չլինեն: Կարելի է այդ դասագրքերը խմբագրել, սրբագրել և ճիշտ վիճակի մեջ բերել: Նաև պետք է ուսուցիչների վերապատրաստության գործընթացն իրականացնել: Այս խնդրի կապակցությամբ մենք ունեինք համաձայնություն, որ ստեղծված հանձնաժողովները պետք է հանդիպեին, քննարկումներ ունենային և համապատասխան լուծումների հանգեին: Այդ առաջարկը կրթության նախարարի հետ հանդիպման ժամանակ բարձրաձայնել ենք և տեսնենք՝ ինչ արդյունքի կհասնենք, ինչ հետևանքներ կունենանք»,-հայտարարել է Վեհափառը:

Գարեգին Բ-ի խոսքով, իրենք ոչ միայն Ժաննա Անդրեասյանին, այլև իրենց հանրային հայտարարությունների մեջ անդրադարձել են, հստակ արտահայտել են եկեղեցու դիրքորոշումը, որ իրենց համար անընդունելի է, մերժելի է մոտեցումը՝ տարրալուծել «Հայ եկեղեցու պատմություն» առարկան այլ առարկաների մեջ կամ սահմանափակել 1 կամ 2 դասարանում դասավանդելով, որովհետև եթե նման մոտեցում է որդեգրվում, պետք է հստակեցվի նպատակը: Մենք առաջարկ ենք բերել, որպեսզի շարունակվեն այդ քննարկումները և փոխընդունելի, ճիշտ լուծման, եզրահանգման հանգենք: Սպասում ենք արձագանքի»,-ասաց Ամենայն Հայոց Կաթողիկոս Գարեգին Երկրորդը։

Աղբյուր` Փաստինֆո