Փաստ ինֆո

«Իսկ Սամվել Բաբայանը կարո՞ղ է հիմնավորել բոլոր այն մեղադրանքները, որ ներկայացնում է ողջ գեներալիտետին՝ մեղադրելով նրանց 44-օրյա պատերազմի պարտության մեջ։ Ես ուզում եմ լսել նրա հիմնավորումները»,- «Փաստինֆո»-ի հետ զրույցում ասում է ռազմական փորձագետ Հայկ Նահապետյանը՝ ի պատասխան Սամվել Բաբայանի՝ երեկ արված հայտարարությանը, թե 44 օրյա պատերազմի պարտության մեղավորը ողջ գեներալիտետն է։

Նշենք, որ Սամվել Բաբայանը 44-օրյա պատերազմի ժամանակ եղել Արցախի Անվտանգության խորհրդի քարտուղարը ու միայն դրա ավարտից հետո է հայտարարել հրաժարականի մասին։

«Սամվել Բաբայանը ողջ պատերազմի ընթացքում եղել է Ստեփանակերտում՝ այնպիսի վայրում, որտեղ բարձրաստիճան զինվորական կազմը որոշումներ է կայացրել,- ընդգծում է Հայկ Նահապետյանը և հավելում, - կա և հիմա էլ գոյություն ունի մի տեսանյութ, որտեղ նույն Սամվել Բաբայանը մի զինվորական օպերացիայի վերաբերյալ հանձնարարականներ էր տալիս։ Խոսքը Շուշիի օպերացիայի մասին է։ Ինքը չի կարող սա հերքել։ Դրանից հետո, նույն Սամվել Բաբայանն անդրադարձել է այսպես կոչված՝ «Լելե Թեփե բարձունքի գրավման օպերացիային», հայտարարելով, թե այդ դրվագում ինքն, ընդամենը, խորհրդական է եղել, հրաման տվող չի եղել։ Սա էլ փաստ է։ Հիմա, ինքն ասում է, որ խորհրդական է եղել և ոչ մի հանձնարարական չի տվել, սակայն, մյուս կողմից՝ ունենք փաստացի տեսանյութ, որտեղ այս մարդը հստակ հրամաններ է տալիս։ Ուրեմն, եթե նա մեղադրում է գեներալիտետին, թե նրանք սխալ հրամաններ են տվել, որի արդյունքում մենք ունեցել ենք պատերազմի խայտառակ պարտությունը, ուրեմն, այդ հրաման արձակողներից մեկն էլ ինքն է եղել։ Համապատասխան տեսանյութերը ջնջված չեն, նորից եմ կրկնում՝ դրանք կան։ Սամվել Բաբայանը կարող է գտնել և նայել, եթե չի տեսել»։

Անդրադառնալով հնչեցված մեղադրանքներին՝ Հայկ Նահապետյանը հարցադրում է կատարում՝ Ազգային Ժողովում 44 օրյա պատերազմի հանգամանքները քննող հանձնաժողով է ստեղծվել։ Արդյո՞ք ինքը՝ Սամվել Բաբայանն այդ հանձնաժողովի անդամ է. «Ինչքանով տեղյակ եմ, նա մեկ կամ մի քանի անգամ քննվել է այդ հանձնաժողովում և ոչ ավելին։ Այսինքն, ինքն այդ հանձնաժողովի անդամ չէ։ Ուրեմն, եթե ինքը չի մասնակցում այդ քննարկումներին, ներկա չէ այդ նիստերին ու չգիտի, թե ի՞նչ է իրականում քննվում այդ հանձնաժողովի նիստերի ընթացքում, ինչի՞ հիման վրա է մեղադրանք ներկայացնում հենց գեներալիտետին»։

Ռազմական փորձագետը նկատում է՝ որքանով ինքը տեղյակ է, ցանկացած օրինական երկրում անձի մեղավորությունը հաստատում կամ հերքում է դատարանը. «Իսկ կարո՞ղ է պատահի Սամվել Բաբայանն իր վրա դատարանի գործառույթ է վերցրել և միանձնյա իրացնում է այդ իրավունքը։ Հնարավո՞ր է, որ նման բան լինի…Իսկ, միգուցե, գեներալիտե՞տը չէ մեղավորը… Միգուցե գեներալները օպերացիաների ճշգրիտ պլանավորում են կատարել, փոխարենը՝ տեղում, սպաները, օրինակ՝ դասակի հրամանատարներ՝ լեյտենետները, վաշտի հրամանատար՝ կապիտան մայորները, գնդի հրամանատար՝ փոխգնդապետ, գնդապետներն են զանցանք կատարողները։ Հնարավո՞ր է, որ հենց այսպես է եղել…Ասեմ, որ ամենայն հավանականությամբ, հենց այդպես էլ եղել է, մեղավորները գեներալները չեն։ Ուրեմն, Սամվել Բաբայանը պարտության մեղքը գեներալիտետի ուսերին բարդելուց առաջ, նախ՝ պետք է լավ մտածի, կամ նման հայտարարություն անելուց հետո, պետք է պարտավորվի ասածները փաստերով հիմնավորի, հաստատի ու ապացուցի։ Հակառակ պարագայում՝ ստացվում է, որ ի դեմս Սամվել Բաբայանի, երկրորդ Նիկոլ Փաշինյան է գլխներիս եկել, չենք իմացել, ով տարատեսակ հիմարություններ դուրս տալով՝ իրեն արդարադատության համակարգի ու դատարանների հետ էր ասոցացնում»։

Խոսելով ավելի հստակ և գործնական, ռազմական փորձագետ Հայկ Նահապետյանը Սամվել Բաբայանին հորդրում է՝ ավելի ճիշտ կվարվի, եթե իր ուսերից իջեցնի ու վայր դնի դատարանի գործառույթները, հաշվի առնելով, որ գոյություն ունի անմեղության կանխավարկած ասվածը, հակառակ պարագայում նա պետք է անուն առ անուն ասի, թե որ գեներալն ինչ օրինազանցություն է կատարել, որի արդյունքում մենք գրանցվել ենք այս խայտառակ պարտությունը. «Մենք էլ կարող ենք ասել, որ կա փաստ՝ տեսանյութ, որտեղ Սամվել Բաբայանը հստակ հրահանգներ է տվել Շուշիի օպերացիայի վերաբերյալ, որի արդյունքում մենք Շուշին կորցրել ենք։ Եվ, եթե Սամվել Բաբայանի հնչեցրած մեղադրանքները մերկապարոնց են հնչում, ապա իր վերաբերյալ կան հստակ փաստեր՝ տեսանյութեր»,- ամփոփելով զրույցն, ասում է Հայկ Նահապետյանը։

Հիշեցնենք, որ նախօրեին Հանրային Հեռուստաընկերությանը տված տեսակամուրջի ընթացքում, ի թիվս շատ այլ հարցերի, Արցախի Պաշտպանության Բանակի նախկին հրամանատար Սամվել Բաբայանն անդրադարձել էր նաև 44 օրյա պատերազմի ընթացքում թույլ տված սխալների և բացերի թեմային, խայտառակ և ստորացուցիչ պարտության մեղքը բարդելով պատերազմի ընթացքում բանակը ղեկավարող գեներալիտետի ուսերին։

Աղբյուր` Փաստինֆո