Փաստ ինֆո

Նիկոլ Փաշինյանը պետք է հասկանա, որ իր ստելու լիմիտը սպառել է և ինքը պետք է հասկանա, որ ամեն անգամ ամբիոնին մոտենալուց և ստելուց հետո պետք է պատասխանատվության ենթարկվի։ Հերիք է։ Հինգ տարի քաղաքացիներին խաբում է Նիկոլ Փաշինյանը։ Այս մասին ԱԺ-ում լրագրողների հետ զրույցում ասաց ԱԺ պատգամավոր Թագուհի Թովմասյանը։

Հիշեցնենք, որ Թագուհի Թովմասյանն ակցիա է իրականացրել՝ հայտարարելով, որ մնալու է ամբիոնի մոտ, սակայն անվտանգության ծառայողները նրան և ակցիային միացած մյուս կին պատգամավորներին բռնությամբ հեռացրել են դահլիճից։

«Այո, ես իրականացնում էի քաղաքական ակցիա, ինչն ընդունված մոտեցում է աշխարհի տարբեր խորհրդարաններում, որ գրավում են ամբիոնը և փորձում են ուշադրություն հրավիրել այն աղաղակող խնդիրների վրա, որոնք լռել են և լսելի չեն իշխանությունների համար։

Իմ ելույթում բոլոր շեշտադրումները դրա մասին էր՝ հերիք է ստեք։ Նիկոլ Փաշինյանը պետք է հասկանա, որ իր ստելու լիմիտը սպառել է և ինքը պետք է հասկանա, որ ամեն անգամ ամբիոնին մոտենալուց և ստելուց հետո պետք է պատասխանատվության ենթարկվի։ Հերիք է։ Հինգ տարի քաղաքացիներին խաբում է Նիկոլ Փաշինյանը։ Իմ ակցիան դրա մասին էր։ Իրենք այդքան բիրտ ուժի կիրառման փոխարեն պետք է հանդուրժեին ընդամենը մի քանի ժամ, ես որոշեի՝ շարունակեմ, թե ոչ, բայց իրենք ինչպես միշտ որոշեցին գնալ բռնության ճանապարհով, ոչ միայն ինձ, այլև՝ իմ գործընկեր կանանց քաշքշելով, բռնությամբ դուրս հանեցին դահլիճից։ Մենք ոչինչ չէինք անում, ուղղակի կանգնած էինք»,- նշեց Թովմասյանը՝ արձանագրելով նաև, որ իրավական առումով խնդիր կա, քանի որ ԱԺ նախագահը հայտարարեց ընդմիջում, մինչդեռ, ընդմիջման ժամանակ որևէ մեկն իրավունք չուներ հեռացնելու պատգամավորներին դահլիճից, ավելին, անվտանգության ծառայողները կարող են մուտք գործել դահլիճ միայն վտանգի դեպքում, սակայն ամբիոնի մոտ կանգնելով իրենք վտանգ չէին ներկայացնում, հետևաբար, ԱԺ նախագահի որոշումը ծայրից ծայր ապօրինի էր, ագրեսիան՝ անհասկանալի։

Աղբյուր` Փաստինֆո