Փաստ ինֆո

Իրավապահ մարմիններն աչք են փակում ՊՆ խորհրդական, Սյունիքի նախկին մարզպետ Մելիքսեթ Պողոսյանի մերձավորների կամ, այսպես ասած, «մաֆիայի» կողմից սյունեցիներին ծեծի ենթարկելու, ճնշելու, ընդդիմախոսներին լռեցնելու դեպքերի մասին ահազանգերի վրա։ Արդյունքում, առանց այն էլ հակառակորդի թիրախում գտնվող Տեղում գյուղացիները ստիպված են լինում դիմակայել նաև քրեաիշխանական տարրերի բռնաճնշումներին։

Այսպես, Տեղ համայնքի ավագանու ընդդիմադիր գործիչ Մասիս Զեյնալյանը երեկ «Փաստինֆո»-ի հետ զրույցում հայտարարել էր, որ Մելիքսեթ Պողոսյանի «մաֆիան» իրեն ծեծի է ենթարկել Մշակույթի տանը, ընդ որում, սա արդեն երրորդ դեպքն է, երբ իրեն են ծեծի ենթարկում։ Բռնության են ենթարկվել նաեւ այլ բնակիչներ, որոնցից մեկը տեղափոխվել է հիվանդանոց։ Զեյնալյանը նշել էր, որ բոլոր դեպքերով դատախազությունը կոծկում է։

Նշենք, որ Մելիքսեթ Պողոսյանից մեկնաբանություն վերցնել չհաջողվեց, հեռախոսազանգերը մնում էին անպատասխան, սակայն «Առավոտ»-ի հետ զրույցում հերքել էր իր առնչությունը դեպքին։

«Փաստինֆո»-ն երեկվանից նաեւ իրավապահ մարմիններին էր դիմել՝ պարզելու, թե ի վերջո քրեական վարույթ կա՞ նախաձեռնված դեպքերով, թե՝ ոչ, սակայն որևէ կառույց այդպես էլ չի արձագանքել դեպքին։ Փաստացի իրավապահները կաշկանդվածություն ունեն իշխանամերձ գործիչների կողմից հնարավոր հանցավոր դեպքերով պատշաճ քննություն իրականացնելու հարցում, առավել ևս, որ Մելիքսեթ Պողոսյանի որդիներից մեկը՝ Մասիս Պողոսյանը, Սյունիքի մարզի դատախազն է։ Ի դեպ, Մելիքսեթ Պողոսյանի մյուս որդին՝ Կարեն Պողոսյանը, մեղադրվում է սպանության փորձ կատարելու մեջ, գործը դատարանում է։

Աղբյուր` Փաստինֆո