Փաստ ինֆո

Ալեն Սիմոնյանի՝ քաղաքացու դեմքին թքելու վերաբերյալ հաղորդման հիման վրա վարույթ չնախաձեռնելն ակնհայտ ապօրինի է և քրեական արդարադատության մարմինների կողմից բարձրաստիճան պաշտոնյային քրեական պատասխանատվությունից պաշտպանելու միջոց է։ Այս մասին «Փաստինֆո»-ի հետ զրույցում ասաց «Իրազեկ քաղաքացիների միավորում» ՀԿ նախագահ Դանիել Իոաննիսյանը։

Հիշեցնենք, որ մարտի 3-ին, քաղաքացի Կարեն Մկրտչյանը ֆեյսբուքյան էջում հայտնել էր, որ Ազգային ժողովի նախագահ Ալեն Սիմոնյանը հրահանգել է իր թիկնազորի աշխատակիցներին բռնել իրեն, ապա մոտեցել ու թքել է վրան այն բանից հետո, երբ Կարենը Ալեն Սիմոնյանին դավաճան է անվանել։ Ավելին, ոստիկանները բերման էին ենթարկել ոչ թե Ալեն Սիմոնյանին, այլ նրա ոչ իրավաչափ գործողությունների հետեւանքով տուժած քաղաքացուն։

Նկատենք, որ Ալեն Սիմոնյանն ավելի ուշ ֆեյսբուքյան գրառմամբ չէր հերքել կատարվածը։

«Ականջներիդ օղ արեք», որ ձեր լկտիությունն անպատասխան չի մնալու ՀՀ օրինական իշխանությանը վիրավորելուն լինելու է օրինական պատասխան»,- նշել էր Սիմոնյանը:

Իրավապահներն իրենց նախաձեռնությամբ դեպքին չեն արձագանքել, հրապարակումներին ընթացք չեն տվել, թեեւ քրեական դատավարության օրենսգրքով մամուլի հրապարակումները եւս առիթ են՝ քրեադատավարական ընթացակարգով քննություն սկսելու համար։ Ապրիլի 5-ին «Իրազեկ քաղաքացիների միավորում» ՀԿ-ն հայտարարեց, որ հանցագործության մասին հաղորդում է ներկայացրել՝ կապված Ազգային ժողովի նախագահ Ալեն Սիմոնյանի կողմից քաղաքացու դեմքին թքելու մասին չհերքված լուրի և ոստիկանության կողմից այդ քաղաքացուն առերևույթ ապօրինի բերման ենթարկելու դեպքի մասով: «Մասնավորապես, քաղաքացու դեմքին ենթադրաբար (չհերքված) թքելու մասով խնդրել ենք քրեական վարույթ նախաձեռնել խուլիգանության (2021 թ. Քրեական օրենսգրքի 297-րդ) հոդվածով:

Իսկ քաղաքացուն առերևույթ ապօրինի բերման ենթարկելու մասով) ակնկալում ենք քրեական վարույթի նախաձեռնում պաշտոնատար անձի կողմից լիազորությունների չարաշահման (ՔՕ հոդված 441) կամ ազատությունից ապօրինի զրկելու (ՔՕ հոդված 192) փաստի առթիվ»,- ֆեյսբուքյան իր էջում գրել էր Դանիել Իոաննիսյանը։

Դատախազությունը ներկայացված հաղորդումն ուղարկել էր ՔԿ, որտեղ քրեական վարույթ չի նախաձեռնվել։ ՔԿ-ից մեզ հետ զրույցում հայտնել էին, որ կազմվել է քրեական վարույթ չնախաձեռնելու արձանագրություն, մինչդեռ Դանիել Իոաննիսյանը «Փաստինֆո»-ի հետ զրույցում նկատեց՝ Քրեական դատավարության գործող օրենսգրքի կարգավորումների համաձայն՝ քրեական վարույթի նախաձեռնման փուլում լիազորություն և գործիքակազմ չունի՝ պարզելու դեպքը եղել է, թե ոչ։

«Մենք էլ չգիտենք, ենթադրում ենք, քանի որ Ալեն Սիմոնյանը չի էլ հերքել։ Պետք է վարույթը նախաձեռնվի և պարզվի՝ դեպքը եղել է, թե ոչ։ Ըստ էության վարույթ նախաձեռնելու միակ իրավիճակն այն էր, որ դիմումի մեջ գրվածին գնահատում են, որ ընդհանրապես քրեական օրենսգրքի որևէ հոդվածով արգելված արարք չի էլ կարող պարունակել։ Սա խայտառակություն է, որովհետև անձին ձեռքերով անշարժացնելը և դեմքին թքելը խուլիգանության դիսպոզիցիայի տակ մտնող արարք է, էլ չեմ ասում անձին ակնհայտ ապօրինի բերման ենթարկելը։ Ինչի համար են այդ մարդուն բերման ենթարկել։ Նրա համար, որ իր դեմքին թքել են, թե որ ԱԺ նախագահին ասել է «դավաճան»։ Քննիչը պարտավոր էր վարույթ հարուցել, քանի որ դիմումում նշված հանգամանքները, այնքանով որքանով հրապարակված են, Քրեական օրենսգրքով արգելված տարրեր պարունակում են, հետո արդեն վարույթի սահմաններում պարզել՝ եղել է, չի եղել, ինչի է եղել, ով է արել։ Նախկինում պետք է բացատրություն վերցնեին, գնահատեին՝ հանցակազմ կա, թե ոչ, հիմա այդ փուլը չկա»,- նշեց Իոաննիսյանը՝ ընդգծելով, որ վարույթ չհարուցելն ակնհայտ ապօրինի է և քրեական արդարադատության մարմինների կողմից բարձրաստիճան պաշտոնյային քրեական պատասխանատվությունից պաշտպանելու միջոց է։

Դիտարկմանը, որ փաստացի իրավապահ մարմինները կաշկանդված են իշխանություններին առնչվող դեպքերով պատշաճ քննություն իրականացնելու հարցում, Իոաննիսյանն արձագանքեց՝ նշելով, որ հստակ դա տեսնում ենք և որևէ այլ ողջամիտ բացատրություն՝ վարույթ չնախաձեռնելուն չկա։

Քրեական վարույթ չնախաձեռնելը կարող է վատ նախադեպ լինել։ Քրեական վարույթ չնախաձեռնելու արձանագրությունը դեռևս չի ստացվել, ստանալուց հետո կքննարկվի դատախազին, իսկ անհրաժեշտության դեպքում նաև դատարան բողոքարկելու հարցը։

Հեղինակ՝ Իզաբել Սահակյան

Աղբյուր` Փաստինֆո