Փաստ ինֆո

«Իմ ունեցած տեղեկություններով, այս պահի դրությամբ մեր կողմից իրականացված բողոքի ակցիայի վերաբերյալ որևէ արձագանք Քննչական կոմիտեից չկա և չեմ էլ կարծում, որ կլինի։ Այսինքն, այս իշխանությունները, որի մի մասնիկն էլ այդ կառույցն է, շարունակում է գնալ նույն ապօրինի ճանապարհով»,- «Փաստինֆո»-ի հետ զրույցում ասում է 44 օրյա պատերազմում զոհված զինծառայող Հայկ Մելիքյանը մայրը՝ Նաիրա Մելիքյանը։

Հիշեցնենք , որ օրեր առաջ 44 օրյա պատերազմում զոհված զինծառայողների ծնողները հերթական բողոքի ակցիան էին իրականացրել ՀՀ Քննչական կոմիտեի առաջ, պահանջելով պատասխանատվության ենթարկել նախորդ տարվա սեպտեմբերի 21-ին «Եռաբլուր» զինվորական պանթեոնում իրենց նկատմամբ բռնության գործադրած ոստիկանության աշխատակիցերին։ 24-ժամյա նստացույցի ընթացքում ՔԿ որեւէ պաշտոնյա այդպես էլ չհանդիպեց ծնողներին, ինչից հետո վերջիններս հայտարարեցին, որ իրավական առումով իրենց պայքարն ավարտվում է, քանի որ իրավական առումով այս երկրում որևէ հարց չի լուծվում ու իրենց պայքարը շարունակվելու է արդեն քաղաքական ասպեկտով։

Նաիրա Մելիքյանը վստահեցրեց, որ բողոքի ակցիաները շարունակական են լինելու, դրանք ավելի մեծ թվով մասնակիցներ են ներառելու իրենց շարքերում։ «Կա, արդեն, մշակված գործողությունների հստակ պլան, որի մասին այս պահին չեմ կարող փակագծեր բացել։ Սակայն, այն, որ քաղաքական պայքարը չի ընդհատվելու, այս հարցում միակարծիք են բոլոր այն ծնողներն, ովքեր նախաձեռնել են այս շարժումն ու սրա շարքերում են»,- ասել է մեր զրուցակիցը։

Հարցին՝ արդյո՞ք Քննչական կոմիտեին դիմելուց զատ, ծնողները չե՞ն պատրաստվում դիմել այլ գերատեսչությունների նույնպես, Նաիրա Մելիքյանը պատասխանում է՝ 2020 թվականից ի վեր այլևս որևէ կառույց չի մնացել, որին չեն դիմել, որի առաջ բողոքի ակցիաներ չեն կազմակերպել՝ էլ Ազգային Ժողով, Կառավարություն, ուժային կառույցներին և այլն, սակայն, ինչպես ցույց է տալիս ժամանակը՝ ապարդյուն. «Անհրաժեշտ է, որպեսզի այս իշխանությունների դեմ բողոքող բացառապես բոլոր մարդիկ համատեղվեն միևնույն պայքարի շրջանակներում՝ կլինի դա ՊՆ նախկին շենքից վտարվածները, Արցախից տեղահանվածները, «Փեթակ»-ի փակվելու որոշման դեմ պայքարողները, թե պատերազմում զոհված զինծառայողների ծնողները։ Պայքարը պտուղներ չի տալիս այն պատճառով, որ մարդիկ գործում են անջատ, առանց համախմբման։ Այս իշխանություններից բողոքում է մեր հայրենակիցների ճնշող մեծամասնությունը, ամեն մեկն իր բողոքի լուրջ և հիմնավոր պատճառն ունի, սակայն, նորից եմ կրկնում, պայքարը մնում է անպտուղ, որովհետև այն համախմբված չէ, սա է բացթողումը, որ պետք է ուղղել»,- նկատում է Նաիրա Մելիքյանը։

Ամփոփելով զրույցը, Նաիրա Մելիքյանն ասում է՝ ակնհայտ է, որ օրվա իշխանությունները չեն պատրաստվում պատասխանատվություն կրել ամենաթող վարքի և իրենց կողմից իրականացված ապօրինի, պետականաքանդ գործողութունների համար. «Ես այսօր, արդեն, հայտարարում եմ՝ մենք չունենք պետություն, չունենք Կառավարություն։ Սրանք թրքացած խունտայի ներկայացուցիչներ են, ովքեր, բացարձակապես, հետաքրքրված չեն մեր պետության անվտանգային հարցերով, առհասարակ, մեր լինելիության հարցը սրանց չի հետաքրքրում։ Մեր զավակների արդար դատաստանը տեսնելու միակ ճանապարհը սրանցից օր առաջ ազատվելն է, սրանց հեռացումը, որն իրենց կամքով չի լինելու, դա անելու է ժողովուրդը։ Հետևաբար, որքան արագ նա համախմբվի այդ նպատակի շուրջ, այդքան արագ կազատվենք այս քաոսից, որի մեջ հայտնվել են ոչ միայն զոհված զինծառայողների ծնողներն, այլև ողջ պետությունը»։

Աղբյուր` Փաստինֆո