Փաստ ինֆո

Արցախի հարցի լուծումը մեծապես կախված է միջազգային խաղացողներից, բայց Արցախում ապրող ժողովուրդը, անկասկած, որոշիչ դեր կարող է խաղալ դրանում։ Այլ հարց է, որ դրան հասնելու համար ոչ մի ռեալ քայլ չի արվում։ Արցախի ղեկավարությունը հանրությանը գաղափարի շուրջ կոնսոլիդացնելու փոխարեն՝ նրան դարձրել է ուղղակի սպառող․ մարդիկ օրերով հերթ են կանգնում 1 կգ միրգ կամ 1 լիտր բենզին ձեռք բերելու համար։ «Փաստինֆո»-ի հետ զրույցում նման տեսակետ հնչեցրեց Արցախի «Արդարություն» կուսակցության համահիմնադիր Հակոբ Հակոբյանը։

«Արտակարգ իրավիճակներում՝ պատերազմի, բլոկադայի ժամանակ, հանրությունը կարող է կոնսոլիդացվել, եթե հացն ու մահը հավասար են լինում։ Մեր պարագայում, երբ հասարակության մի մասը ստեղծված իրավիճակից օգտվում և հարստանում է, մյուսները, ինչպես նշեցի, 1 կգ մրգի համար հերթի մեջ կանգնած վիճում են, դժվար է լինելու համախմբումը։ Սոցիալական այդ իրավիճակը մեղմելու և գաղափարի շուրջ ժողովրդին համախբելու խիստ անհրաժեշտություն կա Արցախում, բայց, ցավոք, դրա համար չունենք կենսունակ իշխանություն։ Արդեն 5-րդ ամիսն է, որ այստեղ ապրող յուրաքանչյուր մարդ, փաստացի, դիմակայում է, պայքարում է։ Մնում է ղեկավարությունը համախմբի էդ պայքարող ժողովրդին ու առաջնորդի»,-ասում է Հակոբյանը։

Ստեղծված իրավիճակից դուրս գալու ուղղությամբ շրջափակման՝ ավելի քան չորս ամիսների ընթացքում, մեր զրուցակցի համոզմամբ, շոշափելի որևէ քայլ չի արվել Արցախի ղեկավարության կողմից։ Փոխարենը, ըստ նրա, իշխանություններն իմիտացիոն գործունեությամբ են զբաղված։

«Ցանկանալով հանրությանը ցույց տալ, թե ինչ-որ քայլեր անում են՝ տարատեսակ կոմիտեներ ու խորհուրդներ են ստեղծում։ Դա ոչ միայն չի օգնում ստեղծված իրավիճակից դուրս գալուն, այլև խանգարում է։ Լայն լիազորություններ տալով այդ կառույցներին՝ ըստ էության, պետական համակարգի հիմքներն են խարխլում։ Այդ գործելաոճը պետք է օր առաջ դադարեցնել։ Արցախն ունի պետական բոլոր ինստիտուտները, որոնք թույլ են տալիս արդյունավետ կառավարում իրականացնել։ Կրկնում եմ՝ կենսունակության խնդիր ունենք ընդամենը․ պետական ինստիտուտները ստվերելու փոխարեն՝ անհրաժեշտ է դրանք մոբիլիազացնել։ Դա է, որ մեզ կտա ստեղծված իրավիճակից դուրս գալու հնարավորություն»,-վստահեցնում է Հակոբյանը։

Կրկին շեշտելով տարբեր կառույցներին լայն լիազորություններով օժտելու անթույլատրելիությունն ու վտանգավորությունը՝ Հակոբյանը նկատում է՝ Արցախի ներկա իշխանություններն իրավիճակին չեն տիրապետում ու չեն պատկերացնում, թե ինչ պետք է անել՝ փակուղային իրավիճակից դուրս գալու համար։

Աղբյուր` Փաստինֆո