Փաստ ինֆո

Խաղաղությունը հնարավոր կլինի, եթե միջազգային հարաբերություններում հստակ ճանաչեն ՀՀ 29 800 քկմ տարածքը և հայտարարենք, որ մենք որևէ այլ երկրից տարածքային պահանջ չունենք: Այսօր ԱԺ-ում նման հայտարարությամբ է հանդես եկել ՀՀ վարչապետ Նիկոլ Փաշինյանը։

«Փաստինֆո»-ի հաղորդմամբ՝ ԱԺ-ում այսօր Նիկոլ Փաշինյանը ներկայացրել է Կառավարության 2021-2026 թթ ծրագրի 2022-ի կատարման ընթացքի եւ արդյունքների մասին զեկույցը, որի շրջանակներում անդրադարձել է նաեւ Հայաստանի արտաքին քաղաքականությանը, Ադրբեջանի հետ հարաբերություններին։

«Ապագայի որեւէ նախագիծ հնարավոր չէ իրականացնել առանց լավատեսության բավարար պաշարի: Առանցքային հարցը հետեւյալն է՝ փոթորկալից այս ժամանակներում կա՞ արդյոք ՀՀ-ում լավատեսության անհրաժեշտ պաշար ապագայի մասին ոչ միայն խոսելու, նախագծելու, այլեւս այդ ապագան կառուցելու եւ իրագործելու համար»,- հայտարարել է Փաշինյանն ու ավելացրել. «Իմ պատասխանը միանշանակ է եւ աներկբա՝ ի հեճուկս բոլոր դժվարությունների եւ բարդությունների ՀՀ-ում ապագայի մասին խոսելու, ապագան պլանավորելու եւ այդ ապագան կառուցելու համար անհրաժեշտ լվատեսություն կա եւ ես վստահ եմ դրանում»:
Ըստ նրա՝ հանրային քննարկումները նման վստահություն չեն տալիս, միջազգային իրադրությունն առավել եւս, բայց հենց այս պահին ՀՀ-ում տեղի է ունենում շուրջ 55 հազար բնակարանի կառուցման գործընթաց:

«Սա Հայաստանի բնակարանային երբեւէ ստեղծված ֆոնդի շուրջ 6 տոկոսն է, բազմաբնակարան շենքերում բնակելի ֆոնդի 12,6 տոկոսը: Երրորդ հանրապետության պատմության մեջ երբեք բնակարնաշինությունն այսպիսի ծավալ չի ունեցել»,-ասել վարչապետը՝ նշելով, թե սահմանային անկայունության, ՀՀ անվտանգային խոցելիության, աշխարհակարգի փլուզման պայմաններում ՀՀ տասնայկ հազարավոր քաղաքացիներ բնակարան են ձեռք բերում, հազարավոր ներդրողներ բնակարան են կառուցում:

«Իմ գնահատմամբ, դա նշանակում է եւ կարող է նշանակել մեկ բան՝ մարդիկ հավատացել են կառավարության խաղաղության օրակարգին, հավատում են, որ խաղաղություն լինելու է եւ իրենք իրենց հայրենիքում երջանիկ ապրելու եւ արարելու հնարավորությու են ունենալու, այլապես իմաստ չէր ունենա բնակարան ձեռք բերել կամ կառուցել: Մարդիկ հավատում են կառավարության «ապագա կա» կարգախոսին»,- հայտարարել է Նիկոլ Փաշինյանը։
Նրա խոսքերով՝ կառավարության պատասխանատվությունը ունի միայն մեկ արտահայտություն, դա խաղաղությունն է, ինչը նշանակում է կարգավորված հարաբերություններ ունենալ 4 հարևանների հետ։ Ու քանի որ Վրաստանի ու Իրանի հետ հարաբերությունների ոչ թե կարգավորման, այլ խորացման խնդիր ունենք, ուրեմն` խաղաղություն նշանակում է կարգավորված հարաբերություններ Ադրբեջանի և Թուրքիայի հետ։

«Հարցերի հարցը հետեւյալն է՝ իսկ որքանո՞վ է դա իրատեսական, որքանո՞վ է իրագործելի: Այս հարցն ունի երկու երես. Առաջինը, որքանով Ադրբեջանի գործողությունները գործողությունները կլինեն խաղաղությանը միտված։ Եվ երկրորդ, հատկապես 44-օրյա պատերազմից հետո եթե քաղաքական-դիվանագիտական մակարդակում կոմպրոմիսներ ձեռք բերվեն, դրանք որքանո՞վ դրանք ընդունելի կլինեն ՀՀ քաղաքացիների համար և քաղաքացիները որքանո՞վ թույլ կտան այդ կոմպրոմիսների` երբեմն ցավոտ լուծումների գործնական իրագործումը»,–ասաց Փաշինյանը՝ ընդգծելով, թե տուն առ տուն, գյուղ առ գյուղ, թաղամաս առ թաղամաս, քաղաք առ քաղաք պետք է մարդկանց բացատրեն, թե ինչ է տեղի ունեցել եւ ինչ է տեղի ունենում մեր երկրի շուրջ, նրանք իրենց կհասկանան. «Նրանք մեզ հասկանում են, հակառակ դեպքում մենք այստեղ չէինք լինի:

Աղբյուր` Փաստինֆո