Փաստ ինֆո

Հակառակորդը՝ թշնամին, սողացող ներխուժում է իրականացնում: «ՓաստԻնֆոյի» եթերում ասել է «Հայրենիք» կուսակցության խորհրդի անդամ, ք.գ.դ., պրոֆ. Խաչիկ Գալստյանը:

«Ես կանխատեսել էի, որ այս իշխանությունները ուղիղ ու գաղտնի պայմանավորվածությունների արատավոր շղթայի մեջ են և, ի դեպ, դրա գաղտնազերծած էլեմենտներից մեկը ընդամենը երեկ էր՝ կառավարության գործունեության հաշվետվության մասով: Հրապարակում եղավ, թե ինչ ուղղություններով են նրանք Ադրբեջանի հետ բանակցությունները վարում: Դրանք ստրատեգիական 4-5 ուղղություններ էին ենթադրում: Դրանց մասին մեր հանրությունը իրազեկված չի եղել»,- նշեց Խ. Գալստյանը:

Բանախոսի կարծիքով, ՀՀ ղեկավարման հեռակառավարման վահանակը գտնվում է Հայաստանից դուրս: ՀՀ-ն ներկայացնողները ստանում են առաջարկներ, ինչ որ կենտրոններում լրամշակվում են, հետ են ուղարկվում և այդպես ստացվում է օնլայն դիվանագիտությունը: ՀՀ իշխանությունները իրենց անհեռատես քաղաքականության արդյունքում ՀՀ-ն արդեն իսկ վերածել են աշխարհաքաղաքական մրցակցության թատերաբեմի: Խոսքը մեկ ուժի մասին չէ. Հայաստանը դառնում է Սիրիայի տարածքի նման մի վայր, որտեղ բոլոր ուժային կենտրոնները կարող են իրենց հատուկ գործողությունները իրականացնել:

Բանախոսի դիտարկմամբ, տեղի են ունենում գլոբալ աշխարհաքաղաքական փոփոխություններ, ուժային կենտրոնները միմյանց միջև կոշտ մրցակցում են: Դեռ միմյանց տարածքում պատերազմների չեն հասել, բայց դրանք տեղափոխել են երրորդ աշխարհի երկրներ: Երրորդ աշխարհի երկիր է համարվում նաև ՀՀ-ն և, փաստացի ՀՀ տարածքում, Արցախի Հանրապետության տարածքում գլոբալ աշխարհաքաղաքական կենտրոնների բախմանը ականատես եղանք: «Օրինակ, Թուրքիան այս տարածաշրջանում որևիցե ռազմական ներկայություն չուներ, ցավոք սրտի, 2020թ. պատերազմից հետո Ակնայում (Աղդամում) ռազմական ներկայություն ունի, Ադրբեջանի ԶՈՒ-ի ողջ կառավարման վահանակը իր ձեռքում է»,- նշեց Խ. Գալստյանը:

Մանրամասները՝ տեսանյութում:

Աղբյուր` Փաստինֆո