Փաստ ինֆո

ԱԺ «Հայաստան» խմբակցության պատգամավոր Մհեր Սահակյանին մեղադրանք է առաջադրվել։ Այս մասին «Փաստինֆո»-ին հայտնել է Քննչական կոմիտեի նախագահի մամուլի քարտուղար Գոռ Աբրահամյանը՝ նշելով, որ նրա նկատմամբ խափանման միջոց է ընտրվել բացակայելու արգելքը:

Հիշեցնենք, որ մարտի 31-ին ԱԺ պետաիրավական հանձնաժողովի փակ նիստում միջադեպ էր գրանցվել հանձնաժողովի նախագահ, քպական Վլադիմիր Վարդանյանի ու ընդդիմադիր պատգամավոր Մհեր Սահակյանի մասնակցությամբ, որի ժամանակ վերջինս մեկ անգամ հարվածել է Վլ. Վարդանյանին։ ՔՊ-ական պատգամավորին բուժօգնություն էր ցուցաբերվել, իսկ ընդդիմադիր պատգամավորը՝ ձերբակալվել։

Ավելին՝ գլխավոր դատախազը նաեւ խորհրդարան է ներկայացրել միջնորդություն՝ ընդդիմադիր պատգամավորին անձեռնմխելիությունից զրկելու վերաբերյալ, ինչին քպական պատգամավորները տվել էին իրենցծ համաձայնությունը՝ 65 կողմ ձայնով։

Մհեր Սահակյանի նկատմամբ քերական հետապնդում է հարուցվել, եւ մեղադրանք ներկայացվել Քրեական օրենսգրքի 297-րդ հոդվածի (Խուլիգանություն) 1-րդ մասով և 171-րդ հոդվածի (Առողջությանը թեթև վնաս պատճառելը) 2-րդ մասի 7-րդ կետով։

Նշենք, որ իշխանական պատգամավորների կողմից ընդդիմադիր պատգամավորների նկատմամբ կիրառված բռնության դեպքերը մնացել են անհետեւանք ու որեւէ քպական պատգամավորի՝ քրեական պատասխանատվության ենթարկելու հարց դատախազությունն այս ընթացքում չի բարձրացրել։

Աղբյուր` Փաստինֆո