Փաստ ինֆո

Ինձ զարմացրեց այն, որ զոհվածների մայրերը այստեղ կանգնած թրջվում են, մրսում են, իսկ մի երիտասարդ տղա՝ Արգիշտի Քյարամյան անունով, ուղղակի չի բարեհաճում իջնել ու խոսել այս մարդկանց հետ: Քննչական կոմիտեի մոտ լրագրողների հետ զրույցում ասել է «Հայրենիք» կուսակցության խորհրդի անդամ Արսեն Բաբայանը:

«Փաստինֆո»-ի հաղորդմամբ՝ զոհված զինծառայողների ծնողները ապրիլի 11-ին 24-ժամյա նստացույց են հայտարարել ՔԿ-ի դիմաց՝ բողոքելով, որ առ այս պահը որեւէ ոստիկանի մեղադրանք չի առաջադրվել «Եռաբլուր» պանթեոնում զոհված զինծառայողների նկատմամբ բռնություն կիրառած ոստիկաններին:

«Ծնողներն ունեն հարցեր, օրինակ, ի՞նչ ընթացքում է այս գործը, արդյոք կան ոստիկանության ծառայողներ, որոնց մեղադրանք է առաջադրվել: Այս մարդիկ սովորական քաղաքացիներ չեն, զոհվածների ծնողներ են, մենք բոլորս ենք պարտք նրանց»,- ասել է Արսեն Բաբայանն ու խոսքն ուղղելով Արգիշտի Քյարամյանին նշել է՝ «Մարդիկ եկել, փողոց են փակել, կանայք են, մրսում են: Ամոթ չի՞: Իջի խոսի, կարող է իջնես, խոսես, միանգամից գնան, կարող է համոզիչ մի բան պայմանավորվես: Սա աբսուրդ վիճակ է»։

Նշենք, որ զոհված զինծառայողների հարազատները երեկվանից ՔԿ-ի դիմաց նստացույց են սկսել: Նրանք նաեւ փակել էին Մամիկոնյանց փողոցը: Ծնողները պահանջում են անհապաղ պատասխանատվության ենթարկել այն 13 ոստիկաններին, որոնք «Եռաբլուրում» սեպտեմբերի 21-ին փաստացի մարմնական վնասվածքներ են հասցրել զոհված զինծառայողների ծնողներին:

Նախորդ տարվա սեպտեմբերի 21-ին Եռաբլուր զինվորական պանթեոնում Արցախյան երրորդ պատերազմում զոհված զինծառայողների ծնողների նկատմամբ ոստիկանության ծառայողները բռնություն էին գործադրել։ Այս դեպքով ոստիկանների ու ծնողների միջև առերեսումներ են եղել։

Աղբյուր` Փաստինֆո