Փաստ ինֆո

Թշնամու կարևոր ձեռքբերումը այսօր մեր պառակտված վիճակն է։ Առաջին բանը, որ պետք է անենք, համախմբվելն է։ Երբ նորից մեկ բռունցք դառնանք, թշնամուն հետ կշպրտենք մեր հողից։

«Փաստինֆո»-ի հետ զրույցում նման համոզմունք հայտնեց Ամարասի վանահայր Տեր Սեպուհը։

«Մարդ հուսալքվում է այն ժամանակ, երբ զգում է, որ միայնակ և անկարող է։ Հոգևորականը միշտ փորձում է մարդկանց մեջ սերմանել, նրանց բացատրել, որ եկեղեցին կենդանի շունչ է, և, իրոք այդպես է։

Եկեղեցին պայծառանում է այն ժամանակ, երբ իր գիրկն են գալիս հավատավոր հայորդիները»,-ասում է Տեր Սեպուհը և հավելում, որ հավատավոր հայը չի կարող միայնակ լինել։

Տեր հայրը նկատում է՝ դժվարություններն ու հուսահատություններն անծանոթ երևույթներ չեն մեզ համար, բայց միասնականությունն է, որ կօգնի ոտքի կանգնել։

«Հայն իր կամքով, տեսակով շատ ուժեղ մարդ է, եւ պատմությունն ապացուցել է, որ ոչ մի զինատեսակ չի կարող հաղթել մեզ, եթե լինենք միասնական եւ բռունցքված: Մենք հոգեւոր պատերազմում պարտվելու իրավունք չունենք. աշխարհաքաղաքական իրավիճակները կապ չունեն մարդու հավատքի հետ։ Եթե մարդն, իրոք, անկեղծ սեր ու նվիրում ունի առ Աստված, ուրեմն չի կարող որևէ բանում ձախողել»,-ասում է վանահայրն ու հավելում, որ Արցախն այսօր առավել, քան երբևէ, միասնականության ու անկեղծ սրտացավության կարիք ունի։

Ամարասի հոգևոր հովիվն ուրախությամբ է փաստում, որ պատերազմից հետո վանք հաճախողների թիվն ավելացել է։

«Հատկապես պատերազմից հետո մարդիկ սկսել են հաճախակի եկեղեցի հաճախել։ Հիմնականում, երբ մարդ նեղ իրավիճակում է հայտնվում, այն ժամանակ է հիշում Աստծուն, մինչդեռ Աստծո տուն հաճախելը շատ կարևոր է։ Եկեղեցին այն վայրն է, որտեղ մարդ հանգիստ է զգում ու, ամենակարևորը, կարողանում է մոտենալ Աստծուն ու հասկանալ նրա խոսքը։ Աստծո օրհնությունը եթե մեկի հետ է լինում, հնարավոր չի, որ նա ձախողի. այդպես է նաև ազգերի դեպքում։ Այն ազգը, որը հարգում և ապավինում է Աստծուն, չի կարող պարտվել։ Շատ անգամ է Արցախը ծանր կացության մեջ հայտնվել, և գրեթե բոլոր այդ դեպքերում մենք միասնաբար աղոթել ենք ու դուրս եկել այդ իրավիճակից»,-նկատում է Ամարասի հոգևոր հովիվը։

Վանահայրը շեշտում է՝ մարդ-Աստված հարաբերությունը պետք է լինի զավակ-ծնող հարաբերությունների նման։ Ինչպես ծնողին ենք սիրում ու շնորհակալություն հայտնում մեզ համար արված ինչ-որ բանի համար, նույնն էլ պետք է լինի Աստծո դեպքում։

«Երբ հարգանքով ու սիրով վերաբերվենք Աստծուն, նույնն էլ նրանից կստանանք»,-ասում է վանահայրն ու հավելում՝ Աստծուն ճանաչելու, նրան մոտենալու համար եկեղեցի է պետք հաճախել։

44-օրյա պատերազմի հետևանքով սահմանապահ դարձած Ամարասի վանքն ադրբեջանական դիրքերից ընդամենը 2-2.5 կմ է հեռու և գտնվում է թշնամու ուղիղ նշանառության տակ։ Այդուհանդերձ, վանական համալիրի դռները այս ընթացքում երբևէ չեն փակվել իր հավատավոր զավակների առաջ...

Աղբյուր` Փաստինֆո