Փաստ ինֆո

Տեղ համայնքում, այս պահի դրությամբ, հարաբերական անդորրը պահպանվում է, բնակիչները զբաղված են համայնքային առօրյա աշխատանքներով։ Այս մասին քիչ առաջ «Փաստինֆո»-ի հետ հեռախոսազրույցում ասաց Տեղ խոշորացված համայնքի ավագանու անդամ Մայիս Զեյնալյանը։

Նախօրեին իր կողմից արված հայտարարության հետքերով դեռ արձագանքներ չկան, ասում է Զեյնալյանը, ով Տեղում, ադրբեջանական վերջին ռազմական սադրանքից հետո, ինքնապաշտպանական աշխատանքների կազմակերպման համար, խնդրել էր զինել համայնքի բնակիչներին և հավելում՝ մեզ զենք է պետք, զինեք, կպաշտպանենք մեզ ու մեր գյուղը։

Փոխարենն արձագանք է գտել Ազգային Ժողովի պատգամավորներին ուղղված իր կոչը՝ գան, տեղում ծանոթանան իրավիճակին և միասին քայլեր ձեռնարկեն։ Ասում է՝ Ազգային Ժողովի «Հայաստան» դաշինքից պատգամավոր եկան, կոչին արձագանքեց նաև իշխող խմբակցությունը։

Վերջինս շեշտում է՝ համայնքում վերջին ռազմական միջադեպի ընթացքում, բանակի գործողությունների արդյունավետությունն, ուղղակի, անգնահատելի էր.«Ցավոք ունեցանք զոհեր, բայց թշնամին նույնպես՝ զոհերի տեսքով կորուստներ գրանցեց։ Հալալ է մեր բանակին, որ կարողանում է արժանապատվորեն կատարել իր առաջ դրված խնդիրը։ Մենք էլ կանգնել ու կանգնելու ենք մեր բանակի կողքին, ուրիշ ոչ մի բան։ Փոխհրաձգության ժամանակ էլ տարածքային փոփոխություններ թույլ չենք տվել»,- ասում է համայնքի ավագանու անդամը։

Հարցին՝ արդյո՞ք առաջիկա օրերին նմանօրինակ սադրանքները կարող են կրկնվել, Զեյնալյանը պատասխանում է՝ ո՞վ կիմանա, թուրքը կարճամիտ մարդ է, ամեն ինչ սպասելի է, մենք էլ միշտ պատրաստ ենք՝ համարժեք հակահարված տալու։

Տեղում կյանքը նորից իր բնականոն ընթացքի մեջ է մտել. «Իհարկե մարդիկ ընկճված են, դե կրակում են, ով չի ընկճվի, սակայն, մարտական ոգին ավելի քան տեղում է։ Գյուղի բնակիչները գիտեն՝ սա իրենց հողն է, ոչ մեկին չեն տալու, ոչ մի տեղ այստեղից չեն գնալու։ Կյանքը բնականոն հունի մեջ է մտել, մարդիկ իրենց անասունների, հողի հետ են, երեխաները դպրոց ու մանկապարտեզ են գնում»,- ասում է Մայիս Զեյնալյանը։

Աղբյուր` Փաստինֆո