Փաստ ինֆո

Այսօր ձերբակալված ադրբեջանցին ՀՀ ոստիկանության Կապանի բաժանմունքում է։ Տեղեկությունը «Փաստինֆո»-ի հետ զրույցում հաստատեցին ՀՀ ՆԳՆ ոստիկանությունից։

Հիշեցնենք, որ օրերս երկու ադրբեջանցի զինծառայող փաստացի անագրել ներթափանցել են ՀՀ սուվերեն տարածք։ Նրանցից մեկը հայտնաբերվել է ապրիլի 10-ին՝ ժամը 01:00-02:00-ն ընկած ժամանակահատվածում՝ Սիսիանի գյուղերից մեկի բնակիչների կողմից, երբ մտել էր գյուղի տուն, թաքնվել, սնվել։ Բնակիչները վնասազերծել են և հանձնել իրավապահ մարմիններին։ Ձերբակալվելուց հետո նա պատմել է, որ իր հետ եղել է ևս մեկ զինծառայող, որին հայտնաբերելու ուղղությամբ որոնողական աշխատանքներ են իրականացվել։ Այսօր ՊՆ-ն հայտնեց, որ ձերբակալվել է նաև երկրորդ ադրբեջանցին, որին հայտնաբերել են Աճանան գյուղում՝ գյուղի երիտասարդները։ Ընդ որում, հայտաբերված ադրբեջանցին, որը պատրաստվում էր սահմանն անցնել, հանդգնել էր ֆեյսբքության էջով ուղիղ եթեր մտնել՝ հայտարարելով, թե հայի արյուն են թափել և այլն։

Նշենք, որ իրավապահներն այժմ փորձում են պարզել, թե ադրբեջանցու մոտ հայտնաբերված հեռախոսն արդյոք պատկանում է երեկ սպանված ԶՄՊԿ աշխատակցին։ Ինչպես արդեն տեղեկացրել ենք՝ երեկ սպանվել է ԶՄՊԿ պահնորդ, 57-ամյա Հայրապետ Մելիքսեթյանը՝ պոչատար գնացող խողովակաշարի վրա աշխատանքներ իրականացնելիս։ Դիակի զննությամբ հայտնաբերվել են հրազենային վնասվածքներ՝ գլխի և կրծքավանդակի շրջանում։ Դեպքի վայրից վերցվել են նմուշներ, երկփողանի հրացան, որը հայտնաբերվել է տնակի մեջ, ինչպես նաև քննությանը հետաքրքրող այլ առարկաներ: Դեպքի առթիվ նախաձեռնվել էր քրեական վարույթ՝ ՀՀ քրեական օրենսգրքի 155-րդ հոդվածի 1-ին մասի և 335-րդ հոդվածի 1-ին մասի հատկանիշներով։

ԶՄՊԿ աշխատակցի սպանության գործով իրավապահների կողմից առաջ քաշվող վարկածներից մեկով իրավապահները դիտարկում են նաև այսօր ձերբակալված ադրբեջանցու կողմից հանցագործությունը կատարելու հանգամանքը, թեև ավելի վաղ ՔԿ մամուլի քարտուղար Գոռ Աբրահամյանը ֆեյսբուքյան գրառմամբ հայտնել էր, որ քննությամբ նման տվյալներ առկա չեն։ Այդուհանդերձ, «Փաստինֆո»-ին հայտնի դարձավ, որ ադրբեջանցու մոտ հայտնաբերված հեռախոսն այժմ վարույթն իրականացնող մարմնում է և փորձում են պարզել, թե արդյոք այն պատկանում էր ԶՄՊԿ սպանված աշխատակցին։

Ի դեպ, Նիկոլ Փաշինյանը երեկ ԱԺ-ում կառավարության հետ հարցուպատասխանի ընթացքում հայտարարել էր, թե իբրև ադրբեջանցի զինվորականները փախուստի էին դիմել համածառայակիցների կողմից ճնշման ենթարկվելու պատճառով, ավելին, երկրորդ ադրբեջանցին, ըստ Փաշինյանի, հենց սահմանը հատելուց հետո ասել է, որ փոշմանել է և ցանկացել է վերադառնալ Ադրբեջան, մինչդեռ, ինչպես պարզվեց՝ ադրբեջանցին ոչ միայն սահմանը հատելուց անմիջապես հետո չի վերադարձել, այլև՝ հանդգնել է ուղիղ հեռարձակում իրականացնել, իսկ սպանության հետ հնարավոր կապը դեռևս կպարզեն իրավապահները։
Հեղինակ՝ Իզաբել Սահակյան

Աղբյուր` Փաստինֆո