Փաստ ինֆո

Մարտի 30-ից հետո Տեղում ստեղծված իրավիճակը մանրամասն քննության կարիք ունի՝ այդ թվում պետական սահմանի այդ հատվածն ի սկզբանե պահպանության տակ առնելու առումով։ Այդ մասին գործադիրի նիստում հայտարարեց Փաշինյանը։

«Նշված տեղամասում Ադրբեջանի գործողությունները սադրիչ են և հակասում են 2022թ. հոկտեմբերի 6-ին Պրահայում և 2022թ. հոկտեմբերի 31-ին Սոչիում կայացած հանդիպումների արդյունքներով ընդունված հայտարարություններին»,-ասաց վարչապետը։
Սահմանային իրավիճակի առումով Փաշինյանը կարևորեց նախօրեին ԵՄ տարածած հաղորդագրությունը, որտեղ ընդգծվում է 1991թ. սահմանագիծը։

«Խոսքը խորհրդային Հայաստանի ու խորհրդային Ադրբեջանի սահմանագծի մասին է, որը 1991թ. դեկտեմբերին Ալմաթայի հռչակագրով վերագրվել է պետական սահմանի։ ԵՄ հայտարարության մեջ արձանագրվել է, որ այդ սահմանագիծը պետք է հարգվի։ Դրանում ընդգծվում է սահմանագծից երկու կողմերի ԶՈՒ հետքաշումն ապահով հեռավորության վրա՝ որպես իրադրության կայունության կարևոր երաշխիք»,-ասաց Փաշինյանը՝ ավելացնելով, որ Հայաստանը պատրաստ է գնալ նման միջոցի՝ Հայաստան-Ադրբեջան 1991թ. սահմանային գծի ողջ երկայնքով։

Ադրբեջանի մոտեցումը որակելով ապակառուցողական՝ Փաշինյանը շեշտեց, որ Ադրբեջանը պարբերաբար ի ցույց է դնում միջազգային պայմանավորվածությունները չկատարելու իր գործելակերպը. այդպես է գերիների ազատ արձակման հարցում, հրադադարի ռեժիմի պահպանման, ուժի կամ դրա սպառնալիքի չկիրառման հարցում, այդպես է Լաչինի միջանցքի ապօրինի արգելափակման հարցում։ Վարչապետը նշեց, որ Ադրբեջանի կողմից Արդարադատության միջազգային դատարանի որոշումը չկատարելու պարագայում նախատեսված են այլ միջոցներ, որոնց պետք է հետամուտ լինի Հայաստանը։

«Ի հեճուկս բոլոր դժվարությունների՝ շարունակում ենք հավատարիմ մնալ ԼՂ հիմնախնդիրը, Հայաստան-Ադրբեջան հարաբերությունները բանակցություններով կարգավորելու քաղաքականոսւթյանը։ Պատրաստ ենք նաև տարածաշրջանային տնտեսական և տրանսպորտային կապերի վերաբացմանը՝ նախկինում մեր բարձրացրած սկզբունքների հիման վրա։ Պատրաստ ենք նաև սահմանների դելիմիտացիային՝ Պրահայի և Սոչիի՝ վերը նշված պայմանավորվածությունների հիման վրա»,-հայտարարեց վարչապետը։

Աղբյուր` Փաստինֆո