Փաստ ինֆո

Այս պահի դրությամբ հարաբերական անդորր է, մարտական գործողություններ չեն եղել։ Դիրքային որևէ փոփոխություններ չեն եղել։ Դիրքային իրավիճակը պահպանվել է, ինչպես եղել է մինչև մարտական գործողությունները։ Որևէ փոփոխություն չկա։ Այս մասին լրագրողների հետ զրույցում ասաց «Քաղաքացիական պայմանագիր» խմբակցության սյունեցի պատգամավոր Արմեն Խաչատրյանը՝ անդրադառնալով ադրբեջանական ռազմական ագրեսիային՝ Տեղում, ինչի հետևանքով հայկական կողմն ունի 4 զոհ և 6 վիրավոր։

Լրագրողի դիտարկումը, որ ՊՆ հրապարակած տեսանյութի համաձայն՝ երևում է, որ ադրբեջանական «պիկապը» մոտենում է հայկական դիրքերին, սակայն հայկական կողմը կրակ չի բացում, արդյոք հրաման կա «չկրակելու», հունից հանեց ՔՊ-ական պատգամավորին. «Լսեք՝ ինչ եմ ասում՝ նման սադրիչ հարցեր այլևս չտաք, որովհետև դուք դրանով բանակի մեջքն եք կոտրում: Ադրբեջանական պիկապը մոտենում էր մեր դիրքերին, որպեսզի բանակցեն, այդտեղ անընդհատ բանակցություն է ընթանում, եկել, բան են պահանջել, պահանջել են, որ մերոնք ինժեներական աշխատանքները դադարեցնեն, մերոնք էլ պատասխան են տվել ըստ արժանվույն: Պատասխանից էլ մարտական գործողություններ են ծագել: Մարտական գործողություններ ենք անում, ասում եք՝ «խի՞ եք արել», չենք անում, ասում եք՝ «խի՞ չկրակեցիք»»:
Խաչատրյանի խոսքով՝ բանակը երեկ իր առջև դրված խնդիրը շատ հստակ կատարել է: Պատգամավորն ընդգծեց, որ մեր զինվորները երեկ Ադրբեջանի սանձարձակությանը արժանի պատասխան են տվել, իհարկե, մարտական գործողություններն ավարտվել են մեր զինծառայողների զոհվելով, փառք ու պատիվ նրանց, բայց բանակը երեկ իր առջև դրված խնդիրը փայլուն կատարել է, դժվարությամբ, բայց փայլուն կատարել է ու շատ լավ է, որ այս պահին խաղաղություն է ու անդորր:

Հարցին՝ ի՞նչ են բանակցում, պատգամավորը հեգնանքով արձագանքեց. «Ասում են՝ եկեք Արցախը տանք ձեզ. չգիտե՞ք՝ ինչ են բանակցում, ինչ են պահանջում, ամեն ինչ անում են, որ մեր ինժեներական աշխատանքները չիրականացվեն, այնտեղ շատ լուրջ, մեծ ծավալի աշխատանքներ են իրականացվել, ինչը ադրբեջանցիների դուրը չի գալիս»:

Մարտը դադարեցնելու հարցում որևէ միջնորդություն չի եղել. դադարեցվել է ՀՀ ու Ադրբեջանի համապատասխան ներկայացուցիչների խոսակցությունների ու բանակցությունների արդյունքում. «Հարցն այսպես է դրվել՝ շարունակո՞ւմ ենք կռվել, զոհեր, վիրավորներ, դառնում է պատերազմ, թե դադարեցվում է ու դադարեցվել է: Դադարեցման մեջ, վստահ եմ, մեծ դեր է ունեցել երեկվա դիրքերում ամուր կանգնելն ու պատասխան հարված տալը», - հայտարարեց նա:

Աղբյուր` Փաստինֆո