Փաստ ինֆո

Հիմա գյուղում ենք, իրավիճակը ներկա պահին հանգիստ է։ Երեկվա հետ կապված մանրամասներ ենք փորձում պարզել ու նաև հասկանալ, թե գյուղացիներն ինչպես են պատկերացնում ստեղծված իրավիճակից ելքերը։ Այդ մասին «Փաստինֆո»-ի հետ հեռախոսազրույցում ասաց «Հայաստան» խմբակցության պատգամավոր Ագնեսա Խամոյանը։

«Հենց հիմա ճանապարհի այն հատվածում ենք, որտեղից գյուղացիները հեռախոսով նկարել էին երեկվա փոխհրաձգությունը։ Այսինքն՝ ադրբեջանցիներն այնքան մոտիկ են տեղակայված գյուղին, որ այդ ամենը տեսանելի էր ու հնարավոր է եղել տեսանկարահանել։ Հիմա կանգնած եմ ու պարզ տեսնում եմ, թե ոնց են ադրբեջանցիները երեք կողմից դիտարկում մեզ։ Այլ կերպ ասած, 2020թ.-ից հետո այնքան են առաջ եկել, որ գյուղը նրանց ափի մեջ է»,-ասաց Խամոյանը։

Ընդդիմադիր պատգամավորի խոսքով՝ այդքանով հանդերձ, գյուղում խուճապ չկա. բնակիչները մտահոգ են, անհանգիստ, բայց չեն կոտրվում.

«Իմ աչքով եմ տեսնում, թե ոնց են տրամադրված մարդիկ։ Մենք գիշերվա ժամը 1-ին ենք այստեղ հասել։ Գիշերը ոչ մեկը դուրս չի եկել գյուղից. երեխաներն էլ, կանայք էլ գյուղում են գիշերել. իհարկե, շորերով են մարդիկ քնել, բայց մնացել են իրենց տներում։ Հենց հիմա էլ զրուցում ենք բնակիչների հետ, ու բոլորն էլ ասում են, որ ոչ միայն մեր զինվորն ու սպան պետք է շատ լավ զինված լինեն, այլև իրենք։ Մարդիկ զենք են ուզում, քանի որ համոզված են՝ միայն մեր ուժերով՝ հայկական բանակով ու աշխարհազորով կարող ենք խնդիրը լուծել։ Այլ կերպ չեն պատկերացնում իրավիճակից ելքը»։

Ագնեսա Խամոյանին բնակիչները նաև պատմել են, թե ինչպես են ադրբեջանցիները սադրել՝ մոտենալով ՀՀ ինքնիշխան տարածքում ինժեներական աշխատանքներ իրականացնող մեր զինծառայողներին, խոչընդոտելով նրանց աշխատանքը, իսկ հետո կրակերթ բացելով մեր զինծառայողների ուղղությամբ։

Հիշեցնենք, որ ադրբեջանական ԶՈՒ ստորաբաժանումների երեկվա սադրանքի հետևանքով զոհվել է ՀՀ ԶՈՒ չորս զինծառայող, վիրավորվել՝ վեցը։

Աղբյուր` Փաստինֆո