Փաստ ինֆո

Հայաստանի տարածքում հայտնված և Սիսիան ներխուժած ադրբեջանցի զինծառայողներն, ըստ Նիկոլ Փաշինյանի, փախուստի էին դիմել՝ համածառայակիցների կողմից նվաստատուցիչ վերաբերմունքի պատճառով և հայտնվել Հայաստանում։

«Կատարված քննչական գործողությունների արդյունքում ակնհայտ է, որ Ադրբեջանի բանակի զինվորն ուղղակի փախուստի է դիմել իրենց դիրքերից, իր ծառայակցի հետ՝ մյուս ծառայակիցների կողմից ճնշումների եւ նվաստացումների ենթարկվելու պատճառով, և ամենևին փաստ չէ, որ նա ցանկանում է վերադառնալ Ադրբեջան։ Մեր միջազգայնորեն ստանձնած պարտավորություններով՝ եթե նման իրավիճակում հայտնված մարդը չի ցանկանում վերադառնալ, մենք չենք կարող նրան բռնի ձևերով վերադարձնել»,- այս մասին ԱԺ-ում կառավարության հետ հարցուպատասխանի ընթացքում հայտարարեց Նիկոլ Փաշինյանը։

Երկրորդ ադրբեջանցի զինծառայողը, որին դեռևս չեն հայտնաբերել, ըստ Փաշինյանի՝ ցանկացել է վերադառնալ Ադրբեջան։
«Ըստ մեր ունեցած տվյալների, երկրորդ զինվորը, որը մինչև հիմա փնտրվում է, ինքը հենց սահմանը հատելուց շատ չանցած, հենց սահմանամերձ գյուղում ասել է, որ փոշմանել է և ուզում է վերադառնալ»,- ասաց նա։

Փաշինյանի խոսքով՝ շատ են քննարկումները, թե ինչպես է ստացվել, որ ադրբեջանցի զինծառայողներն անարգել հատել են սահմանն ու հայտնվել ՀՀ տարածքում։

«Իհարկե, այդ հանգամանքը պետք է առանձին քննվի և պետք է ինչ-որ հետևություններ արվեն»,- ասաց Նիկոլ Փաշինյանը։

Աղբյուր` Փաստինֆո