Փաստ ինֆո

Մենք ֆունդամենտալ պետք է անդրադառնանք այն կոնցեպտին, որով հետապնդվել է ԼՂ հարցը մեր անկախության տարիների ընթացքում։ Անկհայտորեն մենք այդտեղ ունենք 2 մաս` մինչև Մադրիդյան սկզբունքները և դրանից հետո։ Այս մասին Ազգային ժողովում կառավարության հետ հարցուպատասխանի ժամանակ ասաց ՀՀ վարչապետ Նիկոլ Փաշինյանը` արձագանքելով իշխանական պատգամավոր Արուսյակ Ջուլհակյանի այն հարցադրմանը, թե երբ հայկական կողմն ասում է, որ Ադրբեջանից տարածքային պահանջներ չունի, դա ասոցացվում է ԼՂ–ից հրաժարվելու հետ։

«Մինչև Մադրիդյան սկզբունքները հայկական կողմի դիրքորոշումն է եղել, որ ԼՂ-ն երբեք չի եղել անկախ Ադրբեջանի կազմում և ԽՍՀՄ փլուզման համատեքստում իրականացրել է իր ինքնորոշման իրավունքը` ստանալով անկախություն։ Դա ֆիքսված է Ալմա Աթայի պայմանագրում»,–նշեց նա։

Նրա խոսքով` 2007-ին իշխանության փոխանցման շրջանում, երբ Սերժ Սարգսյանը վարչապետ էր, իսկ Ռոբերտ Քոչարյանը նախագահի պաշտոնն էր զբաղեցնում, առաջ եկան Մադրիդյան սկզբունքները, որտեղ ընդգծվում էին և՛ տարածքային ամբողջականության, և ինքնորոշման իրավունքի սկզբունքը։

«Արձանագրվում էր, որ պետք է ճշգրտվի ԼՂ կարգավիճակը, և դրա մեխանիզմը պետք է համաձայնեցված լինի նաև Ադրբեջանի կողմից։ Այստեղ շատ լրջագույն կոնցեպտուալ փոփոխություն է տեղի ունեցել»,- ասաց Փաշինյանը։

Ըստ ՀՀ վարչապետի՝ այդ սկզբունքների հեղինակը, ըստ հավաստի տեղեկությունների, հայկական կողմն է եղել։ Եվ, այստեղ հարց է ծագում` եթե ԼՂ-ն մենք, դուք, իրենք չենք համարում Ադրբեջանի մաս, ինչո՞ւ պետք է ԼՂ կարգավիճակի հարցը համաձայնեցվի Ադրբեջանի հետ։

Ինքնորոշվել նշանակում է լինել որևէ տեղ և տեղափոխվել մեկ այլ տեղ. Մադրիդյան սկզբունքներից առաջ ԼՂ-ի համար այդ տեղը Խորհրդային Միությունն էր, իսկ Մադրիդյան սկզբունքներից հետո Ադրբեջանն է։ Այդ տրամաբանությունը, որ իրենք դրել են, նշանակում է, որ ԼՂ–ն Ադրբեջանի մաս է կամ պետք է լինի Ադրբեջանի մաս, որ ինքնորոշվի։ Հակառակ դեպքում ումի՞ց է ինքնորոշվում»,–նշեց Փաշինյանը։

Նրա խոսքով՝ սա իրենց բացթողումն է, որի մասին 2018-ից հետո չեն խոսել և ժողովրդին բացատրել այս ամենը։

Դրանից հետո էլ, ըստ Փաշինյանի, ՀՀ–ն գնացել ու բանակցային սեղանին ներկայացրել է ԼՂ իրավունքները, այսպիսով դեֆորմացվել է ԼՂ հարցի ամբողջ էությունը։

«Այսօր դրա պտուղներն ենք քաղում»,– հավելեց նա։

Աղբյուր` Փաստինֆո