Փաստ ինֆո

ՄԻՊ-ի թեկնածու Անահիտ Մանասյանը բավարար չափով տեղեկություն չունի՝ Ալեն Սիմոնյանի կողմից քաղաքացու դեմքին թքելու դեպքի վերաբերյալ գնահատական տալու համար։ Մասնավորպես, ԱԺ-ում «Հայաստան» խմբակցության պատգամավոր Արմենուհի Կյուրեղյանը, դիմելով ՄԻՊ թեկնածուին, ասաց, որ հուսով է՝ նա կարևորում է նաև խոսքի ազատությունը։

«Ինչպե՞ս եք գնահատում ԱԺ նախագահ Ալեն Սիմոնյանի վարքագիծը, որը նա դրսևորեց, երբ ՀՀ-ում ՀՀ քաղաքացին, օգտվելով կարծիքի ազատ արտահայտման իր իրավունքից, ներկայացնելով իր քաղաքական գնահատականը, անվանեց «դավաճան», ինչի պարագայում ԱԺ նախագահը հրահանգեց բռնել այդ մարդու ձեռքերը, հետո մոտենում է քաղաքացուն, թքում նրա դեմքին, ասում՝ «դավաճանը մայրիկդ է»։ Կխնդրեի Ձեր գնահատականը՝ որպես ՄԻՊ՝ այդ երևույթին, ինչպես նաև, ելնելով արդարության, ազնվության սկզբունքից, որ յուրաքանչյուր դեպք պետք է ստանա իրավաչափ վերաբերմունք, գնահատեք նաև որպես ՀՀ գլխավոր դատախազի տեղակալ»,- ասաց Արմենուհի Կյուրեղյանը, ինչին արձագանքելով, Անահիտ Մանասյանը փաստացի գնահատական չտվեց Ալեն Սիմոնյանի արարքին։
Մասնավորապես, Մանասյանը նշեց, որ խոսքի ազատության իրավունքը հիմնարար իրավունք է, բայց չի կարող լինել առանց սահմաններին, այդ սահմանների առնչությամբ ևս գոյություն ունեն հստակ ձևավորված միջազգային չափանիշներ։

«Ես իմ խոսքին շատ պատասխանատու եմ վերաբերում, ինչպես նաև՝ այն առաքելություններին ու առաջնահերություններին, որոնց վերաբերյալ խոսել եմ։ Որևէ գործի վերաբերյալ չեմ խոսելու, եթե դրանց վերաբերյալ ծանոթ չեմ բոլոր հանգամանքներ։ Ի դեպ, դա չի վերաբերում բացառապես այն գործին, որի վերաբերյալ խոսեցիք այժմ, խոսքը կարող է վերաբերել նաև Ձեր քաղաքական ուժը ներկայացնող տարբեր անանց վերաբերելի գործերին, ես դրանց վերաբերյալ ինձ թույլ չեմ տալու պարզապես որևէ տեսակ հայտնել՝ գործի հանգամանքները չտիրապետելով։ Ես կարող եմ ընդհանուր ձևակերպում անել, որը հետագայում կկարողանամ շատ ավելի մանրամասնել, երբ կունենամ ՄԻՊ գործիքակազմ, որն այս պահին չունեմ։ Իմ հիմնական արձանագրումն այն է, որ ՀՀ-ում պետք է բացառված լինի ատելության խոսքը, բռնությունը, բռնության քարոզը և ցանկացած իրավիճակ, որը կարող է վնաս պատճառել մարդու իրավունքներին և արժանապատվությանը»,- նշեց Մանասյանը։

Աղբյուր` Փաստինֆո