Փաստ ինֆո

Հայ ժողովրդի թիկունքում տեղի է ունենում մի մութ ու ծանր գործարք, որի ողբերգական հետևանքներին ամեն օր ենք ականատես լինում։ Այդ գործարքի հետևանքով է, որ ադրբեջանցի զինծառայողներն անարգել հասնում են հայկական բնակավայրեր, մտնում են բնակիչների տներ, առանց որևէ դիմադրության զավթում Հայաստանի ինքնիշխան տարածքները և այս ամենը ՀՀ իշխանությունների լուռ համաձայնությամբ։ Այս մասին «Փաստինֆո»-ի տաղավարում ասաց գրականագետ, «Միասին» այլընտրանքային հասարակական-քաղաքական շարժման անդամ Սերժ Սրապիոնյանը։

«Թուրքերը կարողացան նախապատրաստել աշխարհում երբևէ աննախադեպ որակի դիվերսանտների խումբ, բերել բազմեցնել մեր իշխանական աթոռներին և նրանք անշեղորեն կատարում են այն, ինչը 700 տարի շարունակ երազել են թուրքերը»,- ասաց նա։

Սրապիոնյանը ոչ թե պատահականություն, այլ օրինաչափություն է համարում այս իշխանությունների գործունեության ընթացքում հայկական նորանոր տարածքային ու մարդկային կորուստները, ադրբեջանական չդադարող սադրանքները։ Ասում է՝ որտեղ ոտք են դնում Փաշինյանների ընտանիքի անդամները, դրանից կարճ ժամանակ անց այդ նույն տեղում են հայտնվում իրենց հարազատները՝ թուրքերը։ Որպես ամենաթարմ օրինակ Սրապիոնյանը հիշատակում է Սյունիքի բնակավայրեր ներխուժած ադրբեջանական զինծառայողների մասին տեղեկությունը, որոնք, ըստ գրականագետի, ոչ թե մոլորված ադրբեջանցիներ են, այլ դիվերսանտներ։ Սրապիոնյանը տեղեկություններ ունի, որ միաժամանակ այդպիսի 3 խումբ է Հայաստանի տարածք ներխուժել։

«Եղել է 3 խումբ՝ 3-ական մարդուց բաղկացած, դա տիպիկ հետախուզական գործունեություն է, ստուգում են, թե որքանո՞վ են ստույգ այս մարդու (խմբ.- Նիկոլ Փաշինյանի) տված տվյալները, արդյո՞ք զորքերը դիրքերից իջեցվել են, այնտեղ, այսպես կոչված, ԱԱԾ սահմանապահ զորքեր տեղակայվե՞լ են, թե՞ ոչ»,- նշեց նա։

Չլիներ ՀՀ իշխանությունների համաձայնությունը, ադրբեջանցիները չէին հայտնվի Սյունիքում։ Սրապիոնյանի խոսքով՝ իշխանական խունտան հակադրվում է ՀՀ անվտանգությանը։ Փաստերը շատ են։

«Հիշե՛ք բանակի քայքայումը, հիշե՛ք 11.000 դասալիքների մասին առասպելը, «5-րդ շարասյունը» հիշե՛ք, «զենքերից զարդեր կռելու» մասին հիշե՛ք, Շուշիում թեյախմության հրավերը։ Այլապես երկրի «դժբախտ ու դժգույն քաղաքները», «անմարդաբնակ լեռնադաշտերը», «Սև լճի 30 տոկոս» հենց այնպես չեն նվիրաբերվում թշնամուն։ Այսպես խաբելով ժողովրդին, սիրելով, խոնարհվելով այդ ժողովրդի առաջ այս մարդը մաս-մաս երկիրը նվիրաբերում է թշնամուն»,- ընդգծեց Սրապիոնյանը։

Մանրամասները՝ տեսանյութում։

Աղբյուր` Փաստինֆո