Փաստ ինֆո

«Այն որ, Տեղ գյուղում այս պահին կրակոցներ ու զոհեր կան, ցավոք սպասելի էր, որովհետև գոյություն ունեցող լարվածության ֆոնին, ռազմական գործողություններն անսպասելի չեն։ Բայց, որ սա կարող է կայծ հանդիսանալ՝ Սյունիքում լայնամասշտաբ պատերազմի, չեմ կարծում։ Ամեն ինչ կախված է Թուրքիայում սպասվելիք առաջիկա նախագահական ընտրություններից։ Այս մասին «Փաստինֆո»-ի հետ զրույցում ասում է ռազմական փորձագետ Կարեն Հովհաննիսյանը՝ նշելով, որ լայնածավալ պատերազմի վտանգն, անպայման, կտրուկ կմեծանա մայիսի կեսերին, եթե Թուրքիայում ընտրությունների ժամանակ վերընտրվի Էրդողանը։

Լոկալ բախումները, ըստ ռազմական փորձագետի, շարունակական կլինեն, որովհետև հենց Տեղ գյուղի հատվածում, որտեղ ադրբեջանական կողմը նոր դիրքեր է տեղակայել, հեռահար նպատակներ է հետապնդում, այն է՝ իր ձեռքը վերցնել տեղանքի մնացած ռազմավարական նշանակության կարևոր կետերն ու բարձունքները։ Նրանք ամեն ջանք կգործադրեն՝ ունենալու համար բարենպաստ դիրքեր և, որպեսզի հայկական կողմը զրկված լինի համապատասխան ինժեներեկան համակարգերից, ասում է Կարեն Հովհաննիսյանը։

Սյունիքում թշնամու գործողությունների նկատմամբ դիմադրության լիակատար բացակայությունը ռազմական փորձագետը բացատրում է պատկան մարմինների անհետևողականությամբ. «Երբ պայմանավորվածություն կա, որ որևէ իքս տարածքում պետք է տեղի ունենան դիրքերի վերաբաշխում, իսկ հայկական կողմը համառորեն չի դիմում որևէ գործողությունների, այսինքն, քանի դեռ գործը չի հասել կրակելուն, ինժեներական համապատասխան աշխատանքներ չեն կատարվում, ապա այլ արդյունք, քան սա է, սպասելն անմտություն կլիներ»։

Սիսիանի գյուղեր ներխուժած ադրբեջանական զինծառայողների միջադեպը ռազմական փորձագետ Կարեն Հովհաննիսյանը մեկնաբանում է երկրի անվտանգային համակարգի գերխոցելությամբ. «Սա պետք է առիթ հանդիսանա, որպեսզի մենք առավել հստակորեն պատկերացնենք նետված մարտահրավերները։ Ստեղծված իրավիճակում, սահմաններին զինվորներ տեղակայելն, արդեն, բավարար միջոց չէ։ Փաստը մնում է փաստ, որ թշնամական երկրի զինված ուժերի ներկայացուցիչները հայտնվում են քաղաքացիական անձանց բնակարաններում։ Սա խոսում է անթույլատրելիության աստիճանի հասնող բացի և անվտանգային համակարգի վտանգավոր խոցելության մասին»։

Հարցին՝ արդյո՞ք հայկական բանակն, ի վերջո, ունակ է հավաքել իր պոտենցիալն ու ՀՀ սուվերեն տարածք ներխուժած թշնամուն հակահարված տալ, եթե Սյունիքում ռազմական էսկալացիա կամ լայնամասշտաբ ռազմական գործողություններ սկսեն, Կարեն Հովհաննիսյանը պատասխանում է՝ առաջին հեթին անհրաժեշտ է սպառազինության շեշտադրումները փոխվեն. «Ի վերջո, մենք պետք է հասկանանք, թե մենք ի՞նչ բանակ ենք ուզում կամ ինչպիսի՞ բանակ ունենալ է մեզ պարտադրում երկրում ստեղծված այս իրավիճակը՝ պաշտպանվողակա՞ն, հարձակվողակա՞ն, ազատագրո՞ղ, թե՞ մեկ այլ տեսակի։ Կարծում եմ, իրականում, այս փուլում մեզ հարկավոր է, առնվազն, հարձակվողական բնույթի զինտեխնիկաներով հագեցած կանոնավոր բանակ։ Սա նաև զսպող մեխանիզմ կարող է հանդիսանալ՝ ագրեսիվ թշնամու դեմ պայքարում»,- ասում է Կարեն Հովհաննիսյանը։

Հարցին՝ տեսնո՞ւմ է արդյոք ռազմական փորձագետը նման ռազմավարության կառուցում պատկան մարմինների և Պաշտպանության նախարարության կողմից, վերջինս նախընտրեց չպատասխանել։

Աղբյուր` Փաստինֆո