Փաստ ինֆո

«Տիգրան Ավինյանն անում է ամեն ինչ, որպեսզի տարանջատվի այս իշխանություններից՝ լինելով այս իշխանությունների փայատերը,- «Փաստինֆո»-ի հետ զրույցում ասում է քաղտեխնոլոգ Կարեն Քոչարյանը՝ վերլուծելով Երևանի քաղաքապետի թեկնածու Տիգրան Ավինյանի վերջին քայլերը։

Ինչպես արդեն տեղեկացրել ենք՝ Ավինյանն է գլխավորելու Երեւանի ավագանու ընտրություններում իշխող ուժի՝ ՔՊ-ի ցուցակը։ Հրաչյա Սարգսյանի՝ Երեւանի քաղաքապետի պաշտոնից հրաժարական ներկայացնելուց հետո կտրուկ փոփոխություններ նկատվեցին Տիգրան Ավինյանի գործողություններում, նախ սափրվեց, ապա՝ մասնակցեց Սուրբ զատիկի պատարագին, որին իշխանությունները հատկապես 44-օրյա պատերազմից հետո չեն մասնակցում, քանի որ հոգեւոր հայրերը հստակ իրենց անհամաձայնությունը հայտնեցին երկրի տարածքային ամբողջականության դեմ իշխանությունների վարած քաղաքականության կապակցությամբ։

Հարցին՝ արդյո՞ք սա Ավինյան – իշխանություն պայմանավորված խաղի չէ՞, քաղտեխնոլոգը չբացառեց, որ այսպիսով օրվա իշխանությունն իր համար հավատարիմ փոխարինող է պատրաստում, սակայն նկատեց, որ սա ևս ենթադրությունների շարքից է, բայց առավել հավանական։

Քաղտեխնոլոգիական վերլուծության տեսանկյունից, Տիգրան Ավինյանի վերջին օրերի ակնբախ ոճային փոփոխությունները ևս, մի քանի մեկնաբանություն կարող են ունենալ, ասում է պարոն Քոչարյանը. «Ոճափոխությունը, նույնպես, իշխանություններից և, մասնավորապես, Նիկոլ Փաշինյանի կերպարից տարանջատվելու նպատակ է հետապնդում։ Այո, նա սափրված այցելեց եկեղեցի։ Բայց մինչև եկեղեցի գալը նա, սափրվեց։ Նա գնաց եկեղեցի, այն պարագայում, երբ այս իշխանությունների և եկեղեցու միջև առկա հակասություններն այն աստիճանի ակնհայտ են, որ իշխանության անդամները, նույնիսկ, եկեղեցական տոներին, կարծես, եկեղեցի չեն այցելում։ Նկատենք նաև, որ ինքը շփվում է մեծ թվով մարդկանց հետ, այդ թվում նաև նախկինների, որոնց հետ չեն շփվում այս իշխանության շատ ներկայացուցիչներ։ Շատ կարևոր է, որ Տիգրան Ավինյանը նեղացածի դիրք չի ընդունում։ Նա փողոցներում պեռաշկի չի ուտում։ Այսինքն, նա ամեն գնով՝թե՛ շփման եզրերով, թե՛ արտաքին տվյալներով, թե՛ մոտեցումներով, օրինակ, եկեղեցի գնալով, փորձ է անում տարանջատվել այս իշխանության հավաքական կերպարից, որի, կրկնում եմ, փայատերն է նաև ինքը»։

Հարցին՝ չնայած իր ջանքերին, արդյոք, նրան, այնուամենայնիվ, չեն ընկալում որպես իշխանության փայատեր, Կարեն Քոչարյանը պատասխանում է՝ իհարկե, ընկալում են հենց այդպիսին. «Գիտե՞ք, Հայաստանը շատ փոքր երկիր է, իսկ հայաստանյան հասարակությունը, մենթալ առումով, բաց և շփվող է։ Բոլորը և՛ իշխանության, և՛ այսպես կոչված նախկինների, ընդհուպ մինչև՝ նախկինների նախկինների շարքերում ունեն հարազատներ, բարեկամներ, ընկերներ։ Հետևաբար, ասել որ, նախկինները կամ ընդդիմությունն այդ մասին չգիտեն, ծիծաղելի կլինի, իհարկե գիտեն։ Էլ չենք խոսում այն մասին, որ ընդդիմություն ասվածն, ինքնին մի քանի շերտ ունի, այսնինքն, շատ բազմազան է, և մենք ականատես ենք լինում, թե ինչպես, օրինակ այդ ընդդիմության շարքերից ոմանք, ինչպես են անձրևանոց բռնում Վլադիմիր Վարդանյանի համար, կամ տեսնում ենք լուսանկարներ, որտեղ, այսպես կոչված, կարկառուն ներկայացուցիչնեչը նույն կարգի իշխանավորների հետ ջերմ և ընկերական ֆոտոսեսիաներ են անում, լուսանկարներ են հրապարակում։ Այնպես որ այս տեսանկյունից ևս՝ ամեն ինչ հարաբերական է»։

Արդյո՞ք Ավինյան Տիգրանին, այնուամենայնիվ, կհաջողվի կոմպրոմիսային գործարքների գնալ ընդդիմության կամ, այսպես կոչված, նախկինների հետ, Կարեն Քոչարյանը պատասխանում է՝ կախված է նրանից, թե Ավինյանն, իրականում, ինչ նպատակ է հետապնդում. «Գուցե, այո, նա զբաղված է ոչ թե, ասենք, քաղաքապետի, այլ վարչապետական քարոզարշավով։ Միգուցե նա նպատակ է հետապնդում ապագայում Ազգային համաձայնության կառավարության կազմում տեղ գրավելու համար։ Հետևաբար, փորձում է բոլորի հետ լավ լինել՝ և՛ եկեղեցու, և՛ ընդդիմադիրների, ինչո՞ւ չէ՞ նաև իշախանության, որովհետև գաղտնիք չէ, որ հենց իշխանության ներսում, Ավինյանն, ինքը, բավականին լուրջ ընդդիմախոսների բանակ ունի։ Թե այս վարկածներից որը կյանքի կկոչվի, պարզ կդառնա միայն ապագայում տեղի ունեցող իրական զարգացումների արդյունքում»,- ամփոելով զրույցն, ասում է քաղտեխնոլոգ Կարեն Քոչարյանը։

Աղբյուր` Փաստինֆո