Փաստ ինֆո

Ամեն օր մենք ականատես ենք լինում, որ մեր ինքնիշխան տարածքը զավթում են ադրբեջանցիները: Ամբողջ խնդիրն այն է, որ նրանք անարգել եկել, դիրքավորվել են, որեւէ դիմադրության չեն արժանացել: Այս մասին այսօր՝ ապրիլի 11-ին, Ազգային ժողովում լրագրողների հետ զրույցում նշեց ԱԺ «Հայաստան» խմբակցության պատգամավոր Գառնիկ Դանիելյանը:

«Սա շատ լուրջ խնդիր է: Մեր զինվորները չկային, իսկ թե ուր էին, այդ հարցին իշխանությունները պետք է պատասխանեն: Իշխանություններն էլ որեւէ հոդաբաշխ պատասխան չեն տալիս: Ոչ միայն խոսք, այլեւ գործողություններ պետք է լինեն, իսկ բոլոր մեղավորները պետք է պատասխան տան»,-ասաց նա:

Դանիելյանի տեղեկություններով՝ ադրբեջանցիները Տեղ գյուղում մոտ 400 հեկտար դիրքավորվել են Հայաստանի ինքնիշխան տարածքում:
Պատգամավորը նկատեց, որ իրենք ԱԺ ամբիոնից բազմիցս ահազանգել են Կոռնիձորում, Վարդենիսում, տարբեր տեղերում առկա անվտանգային խնդիրների մասին և արձանագրել, որ այսպես շարունակվել չի կարող:

«Իշխանությունը այդ ամենին ոչ ադեկվատ պահվածք է ցույց տալիս: Իրենք պետք է խելոք լինեն, մեր կողմից բարձրացված հարցերը իրենց մոտ գրեն ու գնան լուծեն: Բայց հակառակն է տեղի ունենում, մեր բարձրացրած հարցերին ի պատասխան ստանում ենք ոչ ադեկվատ պատասխաններ, սադրանքներ, ծեծկռտուք»,- նշեց Դանիելյանը:

Դանիելյանն անդրադարձավ նաեւ սահմանային անվտանգության խնդիրներին։ Ասաց, որ վերջերս Կոռնիձոր կատարած այցի ժամանակ անձամբ է տեսել մի քանի հարյուր մետր հեռավորության վրա գտնվող ադրբեջանցիներին։

«Սահմանները բաց են, ես դրա ականատեսն եմ եղել Կոռնիձորում, ես ինքս հնարավոր է ադրբեջանցիների կողմից գերեվարվեի, որովհետեւ սահման չկա: Ես գնացել էի այդ գյուղեր հանդիպումների, պատահական տեսա ադրբեջանցիների մի քանի հարյուր մետր այն կողմ:

Գյուղացիներն ասացին՝ հանկարծ առաջ չգնաք, կարող է գերեվարվեք»,- հավելեց պատգամավորը:

Աղբյուր` Փաստինֆո