Փաստ ինֆո

Անցած 3 տասնամյակների ընթացքում, երբ հայկական կողմի ուշադրությունը հիմնականում սևեռված էր հակամարտության կարգավորման վրա, ոչ ոք չմտածեց, որ եթե նույնիսկ հակամարտությունը լուծվի մեր օգտին կամ մեր տեսակետներին համապատասխան, վերջիվերջո, պետք է տեղի ունենա սահմանների դեմարկացիա և դելիմիտացիա, որ ՀՀ-ն իր սահմաններն ունենա։ «Փաստինֆո»-ի հետ զրույցում նման տեսակետ հայտնեց քաղաքագետ Գարիկ Քեռյանը։

Ըստ նրա՝ սահմանների կոնֆլիկտայնության խնդիրը միշտ է ու հիմա մենք քաղում ենք այդ երկարամյա անպատասխանատու վերաբերմունքի պտուղները և հատկապես վերջին շրջանում անկազմակերպ քաղաքականության հետևանքները, որի պատճառով չհաջողվեց իրականացնել հակամարտության թերևս ամենակարևոր պայմաններից մեկը՝ սահմանազատումն ու սահմանագծումը։

Սահմանների բացակայությունն է պատճառը, որ ադրբեջանցիներն անարգել հայտնվում են ՀՀ սուվերեն տարածքում։ Քեռյանի խոսքով՝ նման դեպքերն առաջիկայում կարող են առավել հաճախակի բնույթ կրել, քանի դեռ սահմանագծում ու սահմանազատում չի իրականացվել։

«Այդ խախտումներն ուղղակի օգուտ են Ադրբեջանին, որովհետև այսօր հայկական կողմը չունի այն ներուժը, որ հստակ սահմանապահ լիազորություն իրականացնի և, օգտվելով դրանից, ադրբեջանցիներն անընդհատ կփորձեն և՛ տարածքներ պոկել, թեկուզ փոքրիկ հողակտորներով, և՛ սահմանամերձ բնակչության մեջ տարածել անվստահության և վախի մթնոլորտ»,- նշեց Քեռյանը։

Քաղաքագետի կարծիքով՝ քանի դեռ սահմանագծման, սահմանազատման ուղեգիծը նշված չէ և չկա պայմանագիր, բոլոր սահմանապահ հատվածներում սահմանապահ զորքերը պետք է բարձր մարտական պատրաստության բերվեն՝ կայուն ռեժիմ ապահովելու համար, ինչպես հայ-թուրքական և հայ-իրանական սահմանին։

Քեռյանը, ինչպես և ՀՀ բոլոր կամ գրեթե բոլոր քաղաքացիները, չգիտի կա՞ արդյոք կոնսենսուս Հայաստանի և Ադրբեջանի ղեկավարների միջև սահմանազատման և սահմանագծման հարցում կամ որևէ փաստաթուղթ, բայց՝ ելնելով Սյունիքի մարզի Տեղ գյուղում տեղի ունեցած վերջին զարգացումներից և առանց զինված ընդհարումների դիրքերի փոփոխություններից, կարելի է կռահել, որ գուցեև կա ինչ-որ պայմանավորվածություն, թե որ տարածքն ում է մնալու։

Նշենք, որ Սյունիքի մարզի Տեղ գյուղում ադրբեջանցիները առանց դիմադրության ներխուժել են սեփականության իրավունքով գյուղացիներին պատկանող հողատարածքներ և ինժեներական աշխատանքներ են իրականացնում, ՀՀ սուվերեն տարածքում ադրբեջանական հենակետեր կառուցում։

Հիշեցնենք, որ այսօր Սիսիանի բնակիչներից մեկը «Փաստինֆո»-ի հետ զրույցում հաստատել էր տեղեկությունը, որ համայնքի բնակավայրերից մեկի տանն ադրբեջանցի զինծառայող է հայտնաբերվել և հանձնվել պատկան մարմիններին։

Ավելի ուշ ՀՀ պաշտպանության նախարարությունը հաղորդագրություն տարածեց, որում նշվում էր, որ Հայաստանի սահմանը հատած 2 ադրբեջանցի զինծառայողներից մեկին ձերբակալել են, իսկ մյուսը փախուստի է դիմել։ ըստ ՀՀ ՊՆ-ի՝ ձերբակալված ադրբեջանցին խոստովանել է, որ իր հետ ևս մեկ ադրբեջանցի է եղել։

Հայաստանի իրավապահներն ու ուժային կառույցները առայժմ լռում են։ Վարկածներից մեկի համաձայն՝ Սիսիան ներխուժած ադրբեջանցիները ոչ թե 2-ն են եղել, այլ 3-ը։

Ավելի վաղ ադրբեջանական ԶԼՄ–ներ հայտնել էին, որ Նախիջևանում ադրբեջանցի 2 զինծառայողի անհետ կորելու մասին։

Աղբյուր` Փաստինֆո