Փաստ ինֆո

ՌԴ գլխավոր դատախազությունը հանձնարարել է Մոսկվայի դատախազությանը ստուգել երգիչ Վալերի Մելաձեին՝ Ուկրաինայի Զինված ուժերին ֆինանսավորման մասով: Այս մասին ՏԱՍՍ-ին հայտնել են իրավապահ մարմիններում։

«Ներկայումս Մոսկվայի դատախազությանը հանձնարարվել է Վ․Շ․ Մելաձեի նկատմամբ ստուգում անցկացնել՝ Ուկրաինայի զինված ուժերին ֆինանսական օգնություն ցուցաբերելու մասով», - ասել է գործակալության զրուցակիցը՝ մանրամասնելով, որ համապատասխան հանձնարարականը ստացվել է Ռուսաստանի գլխավոր դատախազությունից։

«Անվտանգության և կոռուպցիայի դեմ պայքարի դաշնային նախագիծ» հասարակական կազմակերպության ղեկավար Վիտալի Բորոդինն ավելի վաղ դիմել էր գլխավոր դատախազ Իգոր Կրասնովին՝ երգչի նկատմամբ համապատասխան ստուգում անցկացնելու խնդրանքով: Նա նշել է, որ արտիստը բազմիցս հանդես է եկել Ուկրաինայում հատուկ ռազմական գործողության քննադատությամբ, ինչպես նաև ԱՄԷ-ում կորպորատիվ երեկույթի ժամանակ արտասանել է ուկրաինացի ազգայնականների կարգախոսը:

Մարտի վերջին հաղորդվել էր, որ երգիչ Վալերի Մելաձեի ծրագրված համերգները Կրասնոյարսկում, Իրկուտսկում, Նովոսիբիրսկում, Բառնաուլում, Կեմերովոյում եւ Դոնի Ռոստովում չեղյալ են հայտարարվել: Երգչի մեկնաբանությունը ՏԱՍՍ-ը չունի։

Աղբյուր` Փաստինֆո