Փաստ ինֆո

Դատավորների միությունը հանդես է գալիս դատավորների անկախության դատական իշխանության պաշտպանության դերից, այն, ինչ պետք է աներ ԲԴԽ-ն։ Եթե ԲԴԽ-ն այդ քայլերը պատշաճ չի կատարում, դա կարող է լինել հակասության տարբեր դիրքորոշումների առիթ։ Այս մասին լրագրողների հետ զրույցում ասաց Երևանի ընդհանուր իրավասության դատարանի դատավոր Դավիթ Հարությունյանը։

Հարցին՝ արդյո՞ք կա ուղղորդում իշխանությունների կողմից, Հարությունյանը նշեց. «Անկախ նրանից՝ ուղղորդումն ում կողմից է, եթե կանգնում ասում են՝ բացարձակ կոնսենսուս կա, այդպես չի կարող լինել։ Եթե բացարձակ կոնսենսուս է, ուրմեն ինչ-որ մեկի կողմից ուղղորդվում է։ Ընդունենք՝ եթե տասը հոգով գնում են խաշ ուտելու, հնարավո՞ր է, որ բոլորը նույն նախասիրությունները ունենան։ Հնարավոր չէ, որ 10 հոգի նույն կարծիքն ունենան։ Եթե 10 իրավաբան, որոնք տարբեր ունեն տարբեր կենսափորձ, տարբեր ժամանակներում են սովորել, տարբեր բուհերում, կեսը՝ գիտնական են, կեսը՝ դատավորներ, հնարավոր չէ, որ 10 հոգի չունենան սեփական կարծիքը»։

Հիշեցնենք, որ երեկ ԲԴԽ նախագահ Կարեն Անդրեասյանը, քողարկվելով մամուլի քարտուղարի՝ երիտասարդ կնոջ թիկունքում, նրա անունից հայտարարություն էր տարածել՝ նշելով. «Վստահաբար, բոլոր տեղյակ և վերլուծող մարդիկ հասկանում են, որ նման տեղեկության տարածումը կարող է շահավետ լինել վաղը կայանալիք ԲԴԽ անդամի ընտրության միայն այն թեկնածուին, ով հույս ունի ընտրվել դատավորների հուսալքության հենքի վրա: Այսինքն` ոմանք կարծում են, որ իրենց հաղթանակի համար անհրաժեշտ է, որ դատավորները կորցնեն վերջին ամիսներին աստիճանաբար վերականգնվող հավատը: Հավատը` դատական համակարգում բարեփոխումների և դրական զարգացումների նկատմամբ»։

Դատավոր Դավիթ Հարությունյանը լրագրողների հետ զրույցում, անդրադառնալով այս հայտարարությանը, նշեց, որ դա անթույլատրելի է համարում, ընտրությունների նախօրեին որևէ մեկն իրավունք չունի նման արտահայտություն թույլ տալ՝ որևէ թեկնածուի հասցեին։ Ըստ դատավորի՝ նման հայտարարության հեղինակը բարեվարքության խնդիր ունի։

Մանրամասները՝ տեսանյութում

Աղբյուր` Փաստինֆո