Փաստ ինֆո

2020 թվականից հետո թշնամու զորքը Սյունիքի մարզի Կոռնիձոր խոշորացված համայնքից ընդամենը 200 մետր հեռավորության վրա է գտնվում, բայց համայնքապետն ասում է՝ ամեն ինչ լավ է, մարդիկ համակերպվել են թուրքի շնչառության տակ ապրելուն։ Համայնքապետն ինքն էլ եղած իրողությունների հետ կարծես թե հաշտ է ու վաղուց համակերպվել է, որ թշնամին զավթել է Հայաստանի ինքնիշխան տարածքներն ու տիրացել հայոց դաշտերին, արոտավայրերին ու ռազմավարական բարձունքներին։

«Վստահեցնում եմ՝ մեզ մոտ ամեն ինչ լավ է։ Ինչքան շուտ համակերպվես, այնքան մի բան ավելի շատ առաջ կգնաս։ Փառք Աստծո, մարդիկ էլ ինչ-որ տեղ համակերպվել են»,- «Փաստինֆո»-ի հետ զրույցում ասում է ՔՊ-ական համայնքապետ Արշակ Կարապետյանը։

Համայնքապետի պատասխանին հաջորդած՝մի քանի վայրկյան տևած ճչացող լռությունը համայնքապետն ինքն է խախտում. «Իսկ դու ո՞ր տարբերակն ես ընտրում»,- հարցնում է նա։

«Պայքարի»,- արձագանքում է լրագրողը, բայց Կարապետյանն իրեն բնորոշ հատուկ հանգստությամբ շարունակում է համոզել, որ Կոռնիձորում ՀՀ պետական սահմանները ոչ մի սմ չեն խախտվել, որ իրենք կարողանում են գնալ, իրենց հողերը մշակել, իսկ մեր «հզոր կառույցները մտածում են պայքարելու մասին»։

Թե ինչ կառույցների մասին է խոսքը, համայնքապետը փակագծեր չի բացում, փոխարենը՝ լրագրողին համակերպվելու կոչ է անում։

«Եթե այս պահին վատ է, այդ վատին էլ դու պետք է կարողանաս համակերպվել, որ դրա դեմ կարողանաս պայքարել»,- շարունակում է Կոռնիձորի համայնքապետը։

Որ այդքան լավ են աշխատում, ինչու այդ «հզոր կառույցների» հզոր աշխատանքի հզոր արդյունքը չենք տեսնում՝ հետաքրքրվում եմ Կարապետյանից, վերջինս, դարձյալ շատ հանգիստ տոնով, առանց ավելորդ նյարդայնության պատասխանում է, որ արդյունքը մի քիչ ավելի ուշ կերևա։

«Մարդիկ իրենց գործը շատ լավ են անում։ Մեր գյուղի անվտանգության մասին մտածող կա, իսկ իմ գործը կոնկրետ աշխատանքն է, որ աշխատենք, ստեղծենք, հողերը մշակենք, անասուններ պահենք և այլն։ Այդ գործը ճիշտ կատարելով ավելի եմ ամրապնդում գյուղը, իսկ եթե Ձեզ նման խոսեմ, Ձեզ նման հարցեր տամ, Ձեզ նման մոտենամ ժողովրդին, ոչ մի գործ էլ առաջ չի գնա, ժողովուրդը սովի կմատնվի։ Ժողովրդին հետաքրքրում է աշխատանքը, իրենք վստահ են, որ մեր անվտանգությունն ապահովված է, ամեն սանտիմետրը վերահսկվում է։ Ես շատ հանգիստ եմ, շատ արխային եմ»,- նշում է նա։

Կարապետյանը ոչինչ չի խոսում Կոռնիձորին կպած Տեղ գյուղում ադրբեջանական ներթափանցման մասին, ասում է՝ իրենց համայնքապետից հարցրեք, ինքը միայն Կոռնիձորի համար է պատասխանատու։ 2 օր առաջ արցախցի կանանց և երեխաներին ահաբեկելու ադրբեջանական սադրիչ գործողությունների մասին էլ չգիտի Կարապետյանը, ասում է՝ նման բաներ չի լսել։

Լրագրողի դիտարկմանը, որ հասարակական, քաղաքական գործիչները, զոհված զինծառայողների ծնողները տեսանյութեր են հրապարակում, որ հայկական և ռուսական անցակետերի միջակայքում ադրբեջանցիներն ուղեկալ են տեղադրել, ըստ որոշ տեղեկությունների՝ ինքնակամ սահմանազատման ու սահմանագծման աշխատանքներ սկսել, արձագանքը նորից զարմացնում է։

«էդ ինչ ինֆորմացիա են քեզ տվել։ Ես նոր քեզանից լսեցի։ Նման բան չկա, ես չեմ ուզում մտածել նման բաների մասին»,- պատասխանում է համայնքապետը...

Հետո հանդիմանում, թե՝ էդ ինչու է լրագրողն  այդքան անհանգստանում, ինչ վատ է՝ կոռնիձորցիներն աշխատանք ունեն, սովի մատնված չեն...

Աղբյուր` Փաստինֆո