Փաստ ինֆո

Վերաքննիչ քրեական դատարանի դատավոր Մհեր Արղամանյանը կասկածի տակ է դրել «Մատաղիսի գործով» օրինական ուժի մեջ մտած դատական ակտը, որով Վճռաբեկ դատարանի կողմից բեկանվել էր իր կողմից կայացված վճիռը։ Այս մասին տեղեկանում ենք փաստաբան Զարուհի Փոստանջյանի հրապարակած տեսանյութից՝ իր գործով ինքնաբացարկ հայտնելու որոշման հրապարակման վերաբերյալ։

Ինչպես արդեն տեղեկացրել ենք՝ Երևանի ընդհանուր իրավասության դատարանը՝ դատավոր Ռոբերտ Պապոյանի նախագահությամբ, արդարացրել էր Զարուհի Փոստանջյանին ՝ հանցակազմի բացակայության հիմքով։ Արդարացման դատական ակտի տեմ դատախազի կողմից վերաքննիչ բողոք է ներկայացվել, որը մակագրվել է Վերաքննիչ քրեական դատարանի դատավոր Մհեր Արղամանյանին, դատարանի կազմում են նաև դատավորներ Լուսինե Հովհաննիսյանը և Գրիգոր Հովհաննիսյանը։

Նախնական նիստի ընթացքում պաշտպանության կողմը դատավոր Մհեր Արղամանյանին ինքնաբացարկի միջնորդություն է ներկայացրել դատարան, որը, փաստացի բավարարվել է, սակայն խնդրահարույց է դատավոր Մհեր Արղամանյանի կողմից որոշման հրապարակման ժամանակ արված հայտարարությունները, որով փաստացի կասկածի տակ է դրվել «Մատաղիսի գործով» օրինական ուժի մեջ մտած դատական ակտը։ Զարուհի Փոստանջյանը հրապարակել է տեսանյութը՝ հայտնելով, որ սույն գրությունը և հրապարակված տեսանյութը պարունակում է տեղեկատվություն ՀՀ վերաքննիչ քրեական դատարանի դատավոր Մհեր Աղրամանյանի կողմից արգելված արարք կատարելու փաստի վերաբերյալ:

«2023 թվականի ապրիլի 6-ին Գործի համար: ԵԴ/0612/01/21 դատական նիստի ժամանակ դատավոր Մհեր Աղրամանյանը հայտնելով դիրքորոշում արդարացված, սակայն ՀՀ դատախազի վերաքննիչ բողոքի հիման վրա դեռևս մեղադրյալ Զարուհի Փոստանջյանի պաշտպան Հայկ Ալումյանի բացարկի հայտարարությանը հրապարակայինորեն կասկածի տակ է դրել «Մատաղիսի գործով» արդարացման դատական ակտերը:

Մասնավորապես` դատավոր Մհեր Աղրամանյանը հայտնել է հետևյալը մեջբերում եմ. «Կապված իմ նախագահությամբ հայտնի «Մատաղիսի գործով» կայացրած դատական ակտի հետ հարգելով և ընդունելով վերադաս դատարանի որոշումը ես որպես անձ, որպես դատավոր մնում եմ նույն կարծիքի ինչը, որ շարադրված է եղել իմ նախագահությամբ կայացված դատական ակտում»:

Հիշեցնեմ, որ «Մատաղիսի գործով» դատավոր Մհեր Աղրամանյանի նախագահությամբ կայացրած դատական ակտը վերաբերում էր երեք զինծառայողներին, որոնց հանիրավի 2006 թվականի մայիսի 30-ին ՀՀ վերաքննիչ քրեական և զինվորական դատարանը նախագահող դատավոր` Մհեր Աղրամանյան և դատավորներ` Արմեն Դանիելյան, Արթուր Պողոսյան դատապարտել էին ցմահ ազատազրկման երկու զինծառայողների սպանության համար: Այս դատական ակտը բեկանվել էր 2006 թվականի դեկտեմբերի 22-ին ՀՀ վճռաբեկ դատարանի քրեական պալատի որոշմամբ և նոր քննության արդյունքում ՀՀ Շիրակի մարզի առաջին ատյանի դատարանը, 2012 թվականի դեկտեմբերի 8-ին (տես` դատական գործ ՀՅՔՐԴ1/0046/01/08) երիտասարդներին արդարացրել էր: 2013թվականի մարտի 26-ին, ՀՀ վերաքննիչ քրեական դատարանը քննելով սույն գործը Որոշում է կայացրել` թողել օրինական ուժի մեջ ՀՀ Շիրակի մարզի առաջին ատյանի դատարանի 2012 թվականի դեկտեմբերի 8-ի արդարացման դատական ակտը, այս որոշումը մտել է օրինական ուժի մեջ և «Մատաղիսի գործով» վերջնական դատական ակտն է:

Երիտասարդների խախտված իրավունքների վերաբերյալ դատական ակտ է կայացրել նաև Մարդու իրավուքների եվրոպական դատարանը և ճանաչելով Արայիկ Զալյանի, Ռազմիկ Սարգսյանի և Մուսա Սերոբյանի իրավուքները խախտված Հայաստանի Հանրապետությանը տուգանել է 50 հազար եվրո գումարով:

Այսինքն, ՀՀ վերաքննիչ քրեական դատարանի դատավոր Մհեր Աղրամանյանը ոչ միայն ձեռնպահ չի մնացել դիրքորոշում հայտնելուց օրինական ուժ ստացած դատական ակտերի վերաբերյալ, այլ դեռ ավելին այդ դատական ակտերը դրել է կասկածի տակ»,- գրել է Զարուհի Փոստանջյանը։

Հիշեցնենք, որ Երևանի ընդհանուր իրավասության դատարանի դատավոր Զարուհի Նախշքարյանի լիազորությունները դադարեցվել էին՝ դատավոր Աննա Փիլոսյանի լիազորությունները դադարեցնելու մասին ԲԴԽ որոշման վերաբերյալ դիրքորոշում հայտնելու և համակարգային խնդիրներ բարձրաձայնելու համար։

Աղբյուր` Փաստինֆո