Փաստ ինֆո

Քննչական կոմիտեի քննիչներն այս պահին ԱԺ-ում են։ Այժմ քննչական գործողություններ են իրականացվում՝ օրերս ԱԺ «Հայաստան» խմբակցության պատգամավոր Մհեր Սահակյանի և «Քաղաքացիական պայմանագիր» խմբակցության պատգամավոր Վլադիմիր Վարդանյանի միջադեպին ականատես բոլոր պատգամավորների մասնակցությամբ։ Առերես հարցաքննություն է նախատեսված նաեւ Վլադիմիր Վարդանյանի և Մհեր Սահակյանի միջեւ։ Առերեսվել են նաև պատգամավորներ Գեղամ Նազարյանը, Արծվիկ Մինասյանը՝ «ՔՊ»-ական պատգամավորների հետ։

ՀՀ քննչական կոմիտեից «Փաստինֆո»-ի հետ զրույցում հայտնեցին, որ դեպքի հեպ կապված ընթանում են ակտիվ քննչական գործողություններ։

«Այդ վարույթով քննությունն ակտիվ առաջ է ընթանում, իրականացվում են վարույթային քննչական գործողություններ, այդ թվում նաև առերեսումները շարունակվում են»,- հայտնեց ՔԿ խոսնակ Գոռ Աբրահամյանը։

Հիշեցնենք, որ մարտի 31-ին ԱԺ հանձնաժողովի փակ նիստում միջադեպ էր տեղի ունեցել՝ Մհեր Սահակյանի և Վլադիմիր Վարդանյանի միջև, որի ընթացքում Մհեր Սահակյանը հարվածել էր Վարդանյանին։ Դեպքի առթիվ ՀՀ քննչական կոմիտեի Երևան քաղաքի քննչական վարչության ծանր հանցագործությունների քննության բաժնում ՀՀ քրեական օրենսգրքի 297-րդ հոդվածի 3-րդ մասի և 195-րդ հոդվածի 2-րդ մասի 1-ին կետի հատկանիշներով նախաձեռնվել է քրեական վարույթ։ Թեև Մհեր Սահակյանը և դեպքին ականատես ընդդիմադիր պատգամավորները պնդում են, որ Վլադիմիր Վարդանյանն ինքն է սադրել Մհեր Սահակյանին, այդուհանդերձ, իրավապահները 72 ժամով ձերբակալել են միայն Մհեր Սահակյանին, իսկ Վլադիմիր Վարդանյանը, որը միջադեպից հետո տեղափոխվել էր հիվանդանոց՝ աչքի շրջանում ստացած վնասվածքի պատճառով, տուժող է ճանաչվել, նշանակվել է դատաբժշկական փորձաքննություն։ Իրավապահների և ՔՊ-ական պատգամավորների հայտարարությունների համաձայն՝ Մհեր Սահակյանը Վլադիմիր Վարդանյանին հարվածել է ինչ-որ առարկայով, մինչդեռ, Սահակյանը պնդում է, որ հարվածել է բռունցքով, ավելին, ստացել է ձեռքի կոտրվածք, ինչը վկայում է, որ հարվածը եղել է միայն բռունցքով։

Հեղինակ՝ Իզաբել Սահակյան

Աղբյուր` Փաստինֆո