Փաստ ինֆո

Ադրբեջանը շարունակելու է հոգեբանական ահաբեկչության քաղաքականությունը այնքան, մինչև Արցախում որոշեն զիջումների գնալ: Ադրբեջանը այս ընթացքում ընդամենը մի խնդիր է լուծել՝ հասել է Ռուբեն Վարդանյանի հրաժարականին, բայց դա ընդամենը միջոց էր, որ այս թեման չհայտնվի միջազգային հանրության ուշադրության կենտրոնում: «Փաստինֆոյի» եթերում ասել է Ադրբեջանի հարցերով փորձագետ, պ.գ.թ. Տաթևիկ Հայրապետյանը:

Անդրադառնալով Տեղ գյուղում ադրբեջանական հերթական ագրեսիային և եվրոպական դիտորդների արձագանքի բացակայությանը, բանախոսը նշեց, որ ԵՄ դիտորդներից հայկական կողմը արձագանք չի խնդրել: Տեղի իշխանությունները ծածկադմփոց են անում այդ դեպքը, կեղծ արձանագրումներ են անում և փորձում են ներկայացնել թե իրավիճակը բարելավվում է, ուստի ոչ մի եվրոպացի դիտորդ գնահատականներ չի հնչեցնելու:

Չնայած առկա մարտահրավերներին՝ հայ-ադրբեջանական սահմանին զինծառայողները փոխարինվում են սահմանապահներով, ադրբեջանագետը տարակուսում է՝ մյուս կողմից զինված ուժեր են կանգնած՝ ինչպես է հակառակ կողմից սահմանապահ կանգնում: «Այսինքն, ինչ-որ պայմանավորվածություններ կան՝ ոչ հրապարակային, որոնք էլ իրականացվում են, դրա համար էլ իշխանությունը լռելյայն համաձայնվում է, և գիծ են որդեգրել, ըստ որի առաջնորդվում են էսկալյացիա թույլ չտալու տրամաբանությամբ՝ դրանով էլ վախեցնում են մարդկանց պատերազմով: «Ստացվում է՝ իշխանությունները սպառնում են մեզ պատերազմով, եթե փորձենք պաշտպանել երկրի տարածքային ամբողջականությունը»,- նշեց Տ. Հայրապետյանը:

Բանախոսի խոսքերով, մեծ կեղծիք է, թե, իբր, դաշնակիցներ չունենք և թույլ ենք: Ըստ նրա, դաշնակիցներ ունենք, շատ հնարավոր է զենք գնել և պատրաստվել: Ուղղակի իշխանությունը մատնված է հանցավոր անգործության, կամ պայմանավորվածություններ ունի, որոնք փորձում է իրագործել:

Անդրադառնալով հնարավոր խաղաղության պայմանագրին, ադրբեջանագետը նշեց. «Չեմ կարծում, որ առնվազն այս փուլում որևէ պայմանագիր կնքելու են, որովհետև տպավորություն է, որ դրա կարիքը չկա՝ Ադրբեջանը գալիս և հանգիստ նստում է այդ հողերում: Ի՞նչ թղթի կարիք ունի, եթե առաջանում է և հետո կարող է իր պայմաններով թուղթ թելադրել: Իր շահերից էլ չի բխում այս պահին իրեն թղթով սահմանափակելը»:

Մանրամասները՝ տեսանյութում:

Աղբյուր` Փաստինֆո